Í gær heimsótti Gunnþór Eyfjörð Gunnþórsson frá Ásgarði – Íslenskri skólaráðgjöf Austurbrú vegna reglubundinnar endurúttektar á EQM+ gæðavottun stofnunarinnar. EQM+ er gæðakerfi sem ætlað er fræðsluaðilum og nær yfir þrjá lykilþætti: fræðslu, náms- og starfsráðgjöf og raunfærnimat. Vottunin er veitt af Fræðslumiðstöð atvinnulífsins sem nú hefur gert samning við Ásgarð um framkvæmd vottunarúttektanna.

Austurbrú hlaut fyrst EQM gæðavottun fyrir fræðslustarf snemma árs 2013. Árið 2019 var umfang vottunarinnar aukið og nær hún nú einnig til náms- og starfsráðgjafar sem og raunfærnimats. Vottunin staðfestir að Austurbrú vinnur samkvæmt viðurkenndum gæðaviðmiðum og skýrum verklagsreglum. Gæðastjórnun er lykilatriði í fræðslustarfi stofnunarinnar og felst í agaðri og markvissri vinnuaðferð sem miðar að stöðugum umbótum og betri árangri.

Gæðanefnd Austurbrúar, sem hefur starfað frá árinu 2019, kom saman með Gunnþóri við úttektina. Nefndina skipa þær Hrönn Grímsdóttir, Þorbjörg Ólöf Jónsdóttir og Ásdís Helga Bjarnadóttir. Hlutverk nefndarinnar er m.a. að fara yfir sjálfsmatslista árlega, setja gæðaviðmið og -markmið, rýna í námskeiðsmat og bregðast við ábendingum og kvörtunum sem berast. Þær eru ásamt Gunnþóri á meðfylgjandi mynd sem birt er með þessari frétt.

Á Austurbrú ríkir skýr sýn um að ávallt megi gera betur í fræðslu og þjónustu. Því er mikilvægt að fá faglegt og óháð mat á starfseminni, enda er slík rýni grundvöllur að áframhaldandi umbótum. Þátttaka í EQM+ vottunarferlinu er liður í þeirri viðleitni að tryggja að viðskiptavinir Austurbrúar geti treyst á gæði og fagmennsku í allri fræðslu og ráðgjöf sem stofnunin veitir.