Hringrásarhagkerfið: Fræðslumyndbönd

Loftslagsmál hafa verið í brennidepli síðustu ár og áratugi og Austurbrú vill leggja sitt lóð á vogarskálarnar til að stuðla að aukinni fræðslu varðandi þennan málaflokk. Vorið 2022 sótti Austurbrú um styrk í Loftslagssjóð, í samstarfi við sveitarfélögin á Austurlandi, til að framleiða þrjú kynningarmyndbönd með það að markmiði að hvetja samfélagið og einstaklinga á Austurlandi til að vinna að því saman að auka vitund um loftslagsbreytingar, líta í eigin barm og taka upp loftslagsvænan lífsstíl. Styrkur fékkst til að vinna myndböndin og var gengið til samninga við listafólkið Rán Flygenring, Elínu Elísabetu Einarsdóttur og Sebastian Ziegler um gerð kynningarmyndbandanna. Þau voru tekin upp sumarið 2022 og verða kynnt í byrjun árs 2023. Þeim verður dreift í alla skóla á Austurlandi, til opinberra stofnana, sveitarfélaga, annarra landshlutasamtaka og sem víðast og vonir standa til að þau fái gott áhorf og verði okkur öllum hvatning til að gera betur í þessum málum.

Í fyrsta myndbandinu er fjallað um mat og matarsóun þar sem áherslan er lögð á að við lítum okkur nær þegar kemur að því að velja mat og einnig er hvatt til minni matarsóunar. Fjallað er um það hvernig sum matvæli eru flutt til landsins um langan veg, til móts við það hvernig við getum oft með mun auðveldari hætti nálgast matvæli sem framleidd eru nálægt okkur.

Í öðru myndbandinu er fjallað um ferðamáta og hvernig við getum oftar valið umhverfisvænni leiðir til að fara á milli staða, hvernig við getum sameinast í bíla, nýtt almenningssamgöngur betur og þannig minnkað útblástur.

Hringrásarhagkerfið — Úr einu myndbandanna.

Í þriðja myndbandinu er fjallað um endurnýtingu og við hvött til að fara betur með hlutina sem við eigum, deila til annarra því sem við erum hætt að nota og reyna að gera frekar við, heldur en að kaupa alltaf nýtt og lengja þannig líftíma hluta.

Ljóst er að aukin fræðsla leggur þung lóð á vogarskálarnar þegar kemur að því að breyta hegðun. Myndböndin eru stutt og hnitmiðuð, en skilaboðin eru skýr; við getum öll litið í eigin barm og breytt hegðun og áttað okkur á því að við berum öll ábyrgð á því að vinna gegn loftslagsvánni. Það er von okkar hjá Austurbrú að myndböndin hljóti góða dreifingu og verði nýtt til vitundarvakningar um allt land.

Horfa á myndbönd