Ávarp yfirverkefnastjóra

Austurbrú tekur þátt í fjöl­breyttum rann­sóknar- og samfélags­þróunar­verk­efnum sem ætlað er að auka þekkingu á austfirsku samfélagi, stuðla að framþróun og efla
landshlutann. Verkefnin eru í lang­flestum tilvikum samstarfsverkefni, bæði innanlands og utan. Austurbrú er ætlað að sinna rannsóknum samkvæmt samningi
við háskóla-, iðnaðar- og nýsköpunar­ráðuneytið auk þess sem stofnunin sækir um styrki til verkefna gegnum hina ýmsu sjóði eða áætlanir. Ennfremur er unnin fjölþætt greiningarvinna í tengslum við mörg önnur verkefni innan Austurbrúar sem og ýmiskonar útseld greiningarvinna fyrir stofnanir og fyrirtæki, s.s. við starfsánægju- og þjónustukannanir, sem og úttektir og stjórn vinnustofa.

Rannsóknaáherslur eru annars vegar á samfélagið út frá lýðfræði s.s. greiningar á þróun búsetu og hins vegar sérstök áhersla á þekkingaröflun á áhrifum náttúruvár á samfélagið.  Teymi málaflokksins vinnur í sam­­keppnisumhverfi hvað varðar styrki og hefur fengið fjölmarga stærri og minni styrki en stöðugt þarf að vinna að því að fylgjast með sjóðum og umsóknarköllum úr þeim til að viðhalda góðri verkefnastöðu. Lögð hefur verið áhersla á miðlun niðurstaðna og á heimasíðu Austurbrúar má finna kynningar um öll þau verkefni sem teymið hefur unnið að.

Stærstu verkefni teymisins eru vinna í Evrópuverkefnum og Sjálfbærniverkefninu. Unnið var með þrjú EU Horizon-verkefni sem öll eru fjölþjóðasamvinna og standa  yfirleitt í 3-5 ár. Tvö þeirra snúa að nátt­úru­­vá með áherslu á Seyðisfjörð og þriðja snýr að innleiðingu grænna lausna varð­andi náttúruvá eða afleiðinga lofts­lagsbreytinga. Samstarfsaðilar Austur­brúar í Íslandsteymi verkefnanna eru Veður­­stofan, Almannavarnir, Háskóli Íslands og Matís. Þátttaka í þessum verkefnum felur í sér samstarf á stað- og fjarfundum með annars vegar íslensku sam­starfsaðilunum og hins vegar heildar­hópnum sem tekur þátt í verkefninu, auk vinnslu í skilgreindum verkefnapökkum. Einnig felst í verkefnunum  þátttaka í ársfundum sem oftast eru nokkurra daga vinnufundir.

Sjálfbærniverkefni Alcoa og Landsvirkjunar er hluti af verkefnum málaflokksins og er vinnan við það u.þ.b. 80% stöðugildi. Verkefnið hefur verið hýst hjá Austurbrú frá 2013 og felst í söfnun gagna, uppfærslu vísa, viðhald heimasíðu og ársfund verk­efnisins. Árið 2024 var síðasta árið sem gögnum var safnað á hefðbundinn hátt og haustið 2024 var gerður nýr samningur við Landsvirkjun og Alcoa Fjarðaál um að árið 2025 verði uppgjörs- og úrvinnsluár á öllum þeim gögnum sem orðið hafa til í verkefninu.

Austurbrú tók að sér verkefnastjórn í sam­starfsverkefni allra lands­hluta­sam­takanna úr Byggðaáætlun, verkefni sem snýr að stefnumótun varðandi menningarhús á landsbyggðinni og er það stórt verkefni sem lýkur um mitt ár 2025.

Tvö ný verkefni voru undirbúin seinni hluta árs 2024. Annars vegar samningur við barna­málaráðuneyti vegna innleiðingar farsældar­laganna og felst í verkefnastjórn um farsældarráð Austurlands. Ráðinn var verkefnastjóri sem mun leiða verkefnið sem stendur frá 2025 til 2028. Hitt verk­efnið var styrkumsókn í Alcoa Foundation en þaðan fengust 30 milljóna styrkur til þriggja ára í desember 2024. Verkefnið kallast Samkomuhús – geðræktarmiðstöð á Austurlandi og er samstarfsverkefni Heil­brigðisstofnunar Austur­lands, Starfs­endur­hæfingar Austur­lands og félags­þjónustu Fjarðabyggðar og Múlaþings.

Verkefnastjórar sem tilheyra rannsókna- og samfélagsþróunarteyminu vinna flestir að verkefnum í öðrum málaflokkum Austur­brúar þannig að góð heildarsýn verður yfir verkefnastöðu og samlegð verkefna.