Áfangastaðaáætlun Austurlands
VisitAusturland vinnur að samræmdri þróun og markaðssetningu svæðisins á grundvelli Áfangastaðaáætlunar Austurlands. Áhersla ársins 2025 var aukinn sýnileiki utan háannar, efling vetrarferða, samstarf við ferðaþjónustuaðila og þróun efnis og myndefnis til markaðssetningar á landshlutann. Austurbrú heldur m.a. úti ferðavefnum VisitAusturland.is sem þjónar sem upplýsinga- og kynningarvettvangur fyrir gesti og samstarfsaðila.
Samstarf
Austurbrú á formlegt samstarf með um 100 fyrirtækjum, sveitarfélögum og ferðaþjónustuaðilum til að efla sýnileika Austurlands innanlands og á erlendum mörkuðum. Samstarfið er einnig samstillt við stefnu stjórnvalda, við Íslandsstofu og Ferðamálastofu samkvæmt samningi um þróun áfangastaðar. Þátttaka á ferðasýningum, kynningarferðir og móttaka fjölmiðla styrkja sýnileika svæðisins. Reglulegir fundir, haustfundur og fræðslufundir efla faglegt samstarf innan greinarinnar.
Efling Egilsstaðaflugvallar
Á árinu var unnið markvisst að eflingu Egilsstaðaflugvallar sem alþjóðlegrar gáttar inn í landið. Áhersla var lögð á samtal við stjórnvöld, flugfélög og ferðaþjónustuaðila um auknar millilandatengingar og bætt aðgengi að svæðinu allt árið um kring; með þróun markaðsefnis um áfangastaðinn og þátttöku í ferða- og flugkaupstefnum, m.a.í Bretlandi, Þýskalandi, Danmörku og á Spáni. Stefnt er að því að halda flugráðstefnu á Austurlandi árið 2026 til að styðja áfram við þá uppbyggingu.
