Nýsköpun & atvinnuþróun
Austurbrú veitir ráðgjöf á sviði atvinnuþróunar með aðstoð við frumkvöðla og fyrirtæki á Austurlandi. Lögð er áhersla á að aðstoða frumkvöðla við að þróa hugmyndir sínar og verkefna með markvissri fræðslu og sérhæfðri ráðgjöf, þar á meðal varðandi fjármögnun, gerð viðskiptaáætlana, markaðsmál og möguleika á styrkjum. Atvinnuþróunarráðgjafar eiga árlega fjölmörg samtöl við einstaklinga og fyrirtæki og veita stuðning í samræmi við þarfir hverju sinni. Þá er reglulega farið í heimsóknir í fyrirtæki og til einstaklinga sem eru í rekstri á Austurlandi. Tilgangurinn er að efla frumkvöðlastarf og sköpunarkraft á svæðinu og þannig stuðla að nýjum verkefnum og viðskiptatækifærum á Austurlandi. Markmiðið er að styrkja frumkvæði, nýsköpun og verðmætasköpun á svæðinu og skapa þannig jarðveg fyrir ný verkefni og fjölbreytt atvinnu- og viðskiptatækifæri á Austurlandi.
Startup landið
Nýsköpunarhraðallinn Startup landið er samstarfsverkefni landshlutasamtakanna utan höfuðborgarsvæðisins. Markmið hraðalsins er að styðja við frumkvöðla í að þróa hugmyndir sínar, efla viðskiptahæfni ásamt því að byggja upp tengslanet. Hraðallinn hófst 18. september og lauk með lokaviðburði 30. október þar sem þátttakendur kynntu verkefnin sín. Sólbrekka í Mjóafirði tók þátt í verkefninu en þau Margrét og Guðjón í Sólbrekku eru að þróa heilsársferðaþjónustu í Mjóafirði þar sem lögð er áhersla á vetraráfangastað þar sem gestir fá að upplifa frið, myrkur og kyrrð ásamt því að kynnast og komast í návígi við lítið og samheldið samfélag.
Forvitnir frumkvöðlar
Í byrjun árs var farið af stað með hádegisfyrirlestraröðina Forvitnir frumkvöðlar á vegum landshlutasamtakanna. Forvitnir frumkvöðlar eru mánaðarleg fræðsluerindi á netinu sem haldin voru frá janúar og fram í júní. Fræðsluhádegin eru opin öllum en erindin sérstaklega hugsuð til þess að gagnast vel frumkvöðlum sem og öðru áhugafólki um nýsköpun. Fjallað hefur verið um allt frá umsóknarskrifum að rekstri fyrirtækja en verkefnisstjóri Austurbrúar hélt þann fyrirlestur.
