Uppbyggingarsjóður Austurlands

Úthlutað í skugga faraldurs

Á árinu fólst að venju mikil vinna í umsóknarferlinu, frágang gagna til fagráða og úthlutunarnefndar, samningagerð og frágangi að lokinni úthlutun styrkja, auk yfirlesturs og mats framvindu- og lokaskýrslna allra verkefna sem hlutu styrki. Verkferlar eru í nokkuð föstum skorðum en þó alltaf endurskoðaðir út frá athugasendum fagráða og úthlutunarnefndar. Auglýst var eftir umsóknum í september 2019 og var úthlutun fyrirhuguð í febrúar 2020 en frestaðist vegna veðurs og féll svo alfarið niður vegna heimsfaraldursins. Eins og undanfarin ár var útbúinn fallegur bæklingur með lýsingu á verkefnunum sem hlutu styrk auk ávarps formanns úthlutunarnefndar.

Listahátíðin LungA er eitt þeirra verkefna sem UA hefur styrkt í gegnum tíðina.

Verkefnin voru fjölbreytt eins og áður en í úthlutunarreglum Uppbyggingarsjóðs Austurlands er sérstaklega kallað eftir verkefnum sem falla að áherslum nýrrar Sóknaráætlunar Austurlands, sem gildir frá 2020 til 2024, og snúa að málum á sviði menningar og atvinnuþróunar auk tengingar við umhverfismál. Áherslurnar felast í stuðningi við menningarverkefni sem styrkja atvinnustarfsemi á sviði lista og menningar, verkefni sem styðja við menningarstarf barna og ungmenna og verkefni sem draga fram og efla áhugaverða þætti í menningararfleifð.

Áherslur Sóknaráætlunar Austurlands snúa einnig að því að styðja við og efla nýsköpun og frumkvöðlastarfsemi, verkefni sem fela í sér skref að aukinni sjálfbærni og fullvinnslu á Austurlandi þá sérstaklega úr skógarafurðum og á sviði matvælaframleiðslu sem og verkefni sem ríma við hugmyndafræði Áfangastaðarins Austurlands.

Styrkþegar voru bæði aðilar sem áður hafa fengið styrki og nýir. Hæstu styrkina hlutu LungA, Sinfóníuhljómsveit Austurlands og Skaftfell á sviði menningar og Tandraberg á sviði atvinnu. Hæstu styrki einstaklinga hlutu Þór Tulinius fyrir leikverkið um Sunnefu Jónsdóttur og Alona Perepelytsia fyrir Dansskóla Austurlands.

Vegna heimsfaraldurs sem skall á stuttu eftir að úthlutað var úr sjóðnum hafa fjölmörg verkefni frestast eða breytt um framkvæmdaform en aðeins var þó hætt alfarið við eitt verkefni sem telja má að sýni töluverða þrautseigju styrkþega á ófyrirsjáanlegum tímum.