Háskólaþjónusta | Austurbrú

Þjónusta við háskólanemendur var með svipuðu sniði árið 2020 og verið hefur undnafarin ár og nýttist mörgum nemendum. Nokkrir tugir nemenda hafa að staðaldri námaðstöðu á starfsstöðvum Austurbrúar, yfir veturinn, þar sem þeir læra, hlusta saman á fyrirlestra, leysa verkefni og undirbúa sig fyrir próf og verkefnaskil.

Margir fá leiðbeiningar og aðstoð varðandi nám, s.s. námstækni, skipulag verkefna og ráðgjöf vegna prófkvíða. Á árinu 2020 var jafnvel meira en venjulega um að nemendur nýttu námsaðstöðu hjá Austurbrú þar sem sóttvarnarreglur urðu til þess að margir sem annars hefðu verið í staðnámi voru með allt sitt nám í fjarnámi.

Flestir frá HA

Fjöldi þeirra sem nýta aðstöðu hjá Austurbrú hefur annars verið svipaður ár frá ári, um nokkurt skeið enda hefur framboð á námsgreinum í fjarnámi frá íslenskum háskólum að mestu staðið í stað. Nemendur sem nýta þjónustu Austurbrúar eru úr öllum háskólum landsins nema Listaháskóla Íslands og stundum eru nemendur frá erlendum skólum. Flestir stunda nám við Háskólann á Akureyri og næstflestir við Háskóla Íslands. Flestir nemendur sóttu þjónustu til starfsstöðvarinnar á Egilsstöðum og þar á eftir kemur starfsstöðin á Reyðarfirði.

Frá námskeiði í Fróðleiksmolanum Reyðarfirði

Prófaumsýsla umfangsmikil

Prófaumsýsla hefur verið umfangsmikil í starfi Austurbrúar undanfarin ár því próftökur þarf að sinna eftir formlegu verklagi um meðhöndlun prófa, skönnun og sendingu prófúrlausna, meðferð persónugreinanlegra gagna og fleira. Árið 2020 var þó mikið frábrugðið þar sem próftökum á prófstað fækkaði mjög mikið vegna sóttvarreglna sem takmörkuðu möguleika til að stefna nemendum saman til próftöku.

Á vorönn 2020 tóku 84 nemendur 113 próf og á hautstönninni tóku 95 einstaklingar um 160 próf. Þetta er er mikil fækkun frá fyrri árum þegar próftökur hafa verið um og yfir 800 á ári. Langflestir þeirra sem nýta prófaþjónustuna eru fjarnemar frá háskólum en einnig eru nokkrir háskólanemar sem eru í staðnámi í háskólum landsins en nýta sér að taka próf í heimabyggð t.d. sjúkra- og upptökupróf. Nokkuð er einnig um aðrar próftökur svo sem vegna umsókna um ríkisborgararétt, prófa til inntöku í sumar greinar háskólanáms eða réttindaprófa af ýmsu tagi. Af þeim sem tóku próf voru tæp 30% karlar. Af einstökum skólum voru flestar próftökur frá Háskólanum á Akureyri og næstflestar frá háskóla Íslands.