Seigla í kjölfar náttúruhamfara

Árið 2021 fékk Austurbrú styrk frá Byggðarrannsóknarsjóði til þess að hefja rannsókn á seiglu í kjölfar náttúruhamfara á Seyðisfirði. Rannsóknin ber heitið Seigla í kjölfar náttúruhamfara, fór af stað undir lok árs 2021 og er langt komin. Tekin voru viðtöl við íbúa og viðbragðsaðila, auk þess sem spurningalisti var lagður fyrir íbúa. Vonast er til þess að rannsóknin gefi hugmynd um það hvað það er sem myndar seiglu í samfélagi og virkar verndandi þegar samfélagsáfall eins og náttúruhamfarir verða. Þá er verið að kanna upplifun og líðan íbúa gagnvart atburðum og áhrif þeirra á líf íbúa.

Fyrstu niðurstöður úr viðtölum við íbúa og viðbragðsaðila benda til þess að upplifun íbúa og viðbragðsaðila af atburðum og aðdraganda séu ekki alveg sambærilegar, þó flestir telji alla hafa gert sitt besta. Margt bendir til þess að brott flutningar íbúa séu í lágmarki í kjölfar áfallanna sem er verulega jákvætt en einnig er staðan sú að ekki allir geta flutt burt. Sameiginlegt áfall virðist vissulega hafa þjappað samfélaginu saman og baráttuhugur er í fólki. Þó getur reynst fólki erfitt að viðurkenna ef það vill flytja burt, því fólki þykir vænt um bæinn sinn og vill honum það besta. Ef brott flutningar aukast væri það auðvitað annað högg fyrir bæinn og atvinnulíf þar. Fólk virðist að mestu bjartsýnt gagnvart framtíð bæjarins en einhverjar áhyggjur eru yfir atvinnulífi á svæðinu og að úrræði til stuðnings þess fari að dvína. Bið eftir hættumati hefur auk þess sett íbúa í óvissustöðu um nokkuð langa hríð en óvissustig sem þetta getur auðvitað haft áhrif á það hvaða möguleikar standa íbúum til boða, hvort sem varðar atvinnu eða einkalíf. Margir hafa áhyggjur af því hvað verður um íbúabyggð og stórt atvinnusvæði sem liggur nú á hættusvæði en ekki allir geta hugsað sér að starfa á svæði þar sem óvissa ríkir um öryggi.