Þýðingarmikil rannsókn
„Það er mikilvægt fyrir okkur að grípa tækifærið núna og rannsaka því ég held að lærdómurinn geti orðið mikill fyrir land eins og okkar þar sem náttúruhamfarir eru hluti af daglegu lífi“ – Tinna Halldórsdóttir, félagsfræðingur.
Rannsókn á félagslegri seiglu á Seyðisfirði
Austurbrú fékk nýverið styrk frá Byggðarannsóknasjóði fyrir verkefni er kallast Náttúruhamfarir og félagsleg seigla þar sem sjónum er beint að Seyðisfirði og afleiðingum aurskriðanna í desember síðastliðnum. Tilgangur rannsóknarinnar er að greina og kortleggja afleiðingar náttúruhamfaranna á Seyðisfirði með tilliti til samfélagslegrar seiglu.
Liður í uppbyggingarstarfi
Á síðustu mánuðum hefur hefur Austurbrú ásamt sveitarfélaginu Múlaþingi unnið að verkefnum sem tengjast aurskriðunum á Seyðisfirði en helsta verkefni stofnunarinnar hefur verið greiningarvinna á áhrifum hamfaranna á atvinnulífið, þá var komið á laggirnar hvatasjóði og boðið hefur verið upp á ráðgjöf fyrir þá sem standa frammi fyrir rekstrarvanda í kjölfar skriðanna. Rannsóknin er liður í þessari vinnu en tilgangurinn er að greina og kortleggja afleiðingar náttúruhamfaranna á Seyðisfirði með tilliti til samfélagslegrar seiglu. Með því er átt við heildstæða greiningu á þeim styrkleikum og veikleikum sem hafa áhrif á þróun samfélagsins á Seyðisfirði næstu árin.
Vel þekkt hugtak
Í stuttu máli er seigla geta okkar til að standast álag m.a. vegna innri styrks af einhverjum toga t.d. hæfnin til að sýna sveigjanleika þegar umhverfið breytist skyndilega. Þýðing rannsóknarinnar er talsverð því seig samfélög hafa bolmagn til að standast og aðlagast eftir erfiða atburði. Almennt má segja að skortur á seiglu geti t.d. valdið tilfinningu varnarleysis hjá fólki gagnvart náttúrunni og aukið möguleika á hvers konar tapi s.s. fólksflutningum, óstöðugleika í lýðfræðilegri samsetningu, atvinnulífi og nýsköpun.
Lærdómurinn getur orðið mikill
Tinna Halldórsdóttir, félagsfræðingur hjá Austurbrú, mun hafa umsjón með framkvæmd rannsóknarinnar. Hún segir þetta afar spennandi verkefni og ekki mörg dæmi um íslenskar rannsóknir þar sem seigla samfélaga sé til skoðunar. „Samfélög eru lífræn og lifandi fyrirbæri eins og einstaklingarnir sem byggja þau og eiginleikinn til að bregðast við að spyrna móti þegar gefur á bátinn er lífsnauðsynlegur,“ segir hún. Viðnámsþol sé hugtak sem sé vel þekkt í fjölmörgum greinum s.s. umhverfisvísindum, verkfræði, félagsfræði, sálfræði og hagfræði. „Það er mikilvægt fyrir okkur að grípa tækifærið núna og rannsaka því ég held að lærdómurinn geti orðið mikill fyrir land eins og okkar þar sem náttúruhamfarir eru hluti af daglegu lífi,“ bætir hún við.
Niðurstöður í lok árs
Austurbrú fékk 2.500.000 kr. frá Byggðarannsóknasjóði en gert er ráð fyrir að verkefnið sé langtímarannsókn og að þetta fjármagn dekki vinnu við framkvæmd fyrsta hluta þess sem fólgin er í undirbúningi og frumgagnaöflun. Reiknað er með að niðurstöður þessa fyrsta fasa verði kynntar í lok árs.
Nánari upplýsingar
Urður Gunnarsdóttir
Egilsstaðir
Fleiri fréttir
Frá stofnun hefur Austurbrú unnið að fjölmörgum verkefnum á sviði menningar, markaðssetningar, atvinnuþróunar og fræðslu. Kynntu þér nýjustu tíðindin!
Skoða fréttasafn
