Fræðsla

Austurbrú sinnir fræðslu fyrir innflytjendur á Austurlandi og hefur m.a. staðið að íslenskukennslu fyrir þann hóp í fjölmörg ár en haldin voru 18 námskeið í íslensku fyrir útlendinga í sex byggðakjörnum á Austurlandi á liðnu ári. Þannig hefur skapast mikil reynsla og þekking innan stofnunarinnar sem hefur staðið að þróun kennsluefnis og undanfarið aðlagað það að Evrópska tungumálarammanum (CEFR). Með fjölgun fólks af erlendum uppruna kemur ákall um enn frekari þróun á kennsluefninu, að boðið sé uppá fjölbreyttari námsleiðir og að geta sinnt námi að einhverju leiti ókeypis og á hvaða tíma sem er. Nýjasta verkefni Austurbrúar á þessu sviði er því þróun íslenskukennsluappsins Lísu. Fræðslunámskeiðið Landneminn inniheldur hins vegar samfélagsfræðslu fyrir flóttafólk og aðra innflytjendur. Markmið námsins er að veita innsýn og almenna fræðslu um íslenskt samfélag og gefa nemendum tækifæri til að ræða það sem brennur á þeim enda óhjákvæmilegt að ýmsar spurningar vakni þegar fólk þarf að aðlagast nýjum aðstæðum í nýju landi. 

Á vorönn stunduðu tveir nemar tölvunarfræði frá HR/HA í námsveri Austurbrúar á Reyðarfirði og fengu þar stuðning við nám sitt. Um haustið ákvað HA að sjá alfarið um þjónustuna við þá en fengu notið námsversins áfram. Fimm nemendur eru skráðir í tölvunarfræðina frá haustinu 2023 og sinna því  á Reyðarfirði. 

Um 118 háskólanemendur hafa nýtt sér aðstöðu og þjónustu Austurbrúar á árinu, þar af um 50 sem hafa fengið afhenta lykla af námsaðstöðu sem stendur til boða á Egilsstöðum. Nokkur aukning er á útleigu og afnot af aðstöðu Austurbrúar vegna starfa óháð staðsetningu opinberra starfsmanna og í tengslum við rannsóknaverkefni.

Á vormánuðum vann starfsnemi í náms- og starfsráðgjöf, Svala Björk Kristjánsdóttir undir handleiðslu Hrannar Grímsdóttur náms- og starfsráðgjafa hjá Austurbrú, verkefni þar sem aðstæður og þarfir háskólanema í fjarnámi á Austurlandi voru skoðaðar. Niðurstöðurnar liggja fyrir og verður unnið áfram með þær til að koma enn betur til móts við þarfir þess markhóps.

Í upphafi námsvetrar sendi Austurbrú háskólum landsins upplýsingar um þá þjónustu sem háskólanemum er veitt á Austurlandi, s.s. aðstöðu til próftöku, náms, aðgengi að náms- og starfsráðgjafa og raunfærnimat, auk örnámskeiða m.a. um tímastjórnun, skipulag, heimilda- og gagnasöfnun, prófkvíða og próftækni. Haldið er utan um samfélag háskólanema á Austurlandi með sérstakri Facebook-síðu þar sem upplýsingum er komið á framfæri.

Starfsfólk Austurbrúar heimsækir gjarnan fyrirtæki og kynnir þau tækifæri sem geta falist í því fyrir vinnustaði að vera í samstarfi við Austurbrú um fræðslu starfsfólks. Austurbrú getur veitt fyrirtækjum og stofnunum ráðgjöf um símenntun starfsfólks og unnið með þeim að ýmsum menntaverkefnum, t.d. gert fræðsluáætlanir, boðið ráðgjöf um nám og starfsþróun, haft milligöngu um raunfærnimat fyrir starfsfólk og boðið stök námskeið. Starfsfólk Austurbrúar hefur mikla reynslu af skipulagningu námskeiða, hefur víðtækt tengslanet við menntastofnanir, aðra fræðsluaðila og kennara og starfar samkvæmt viðurkenndum gæðaviðmiðum.  

Eitt af viðameiri verkefnum náms- og starfsráðgjafa hjá Austurbrú er að sinna raunfærnimati. Náms- og starfsráðgjafar sinna bæði hlutverki ráðgjafa og verkefnastjóra í raunfærnimats verkefnum Austurbrúar. Markmið með raunfærnimati er að meta eða viðurkenna óformlegt nám og þekkingu sem fólk hefur aflað sér utan hins formlega skólakerfis. Það eru tvær meginleiðir í raunfærnimati, Raunfærnimat á móti námskrám og þá einkum í framhaldsskóla og raunfærnimat á móti hæfniskröfum starfs og fer það þá fram á vinnustaðnum. Íbúum Austurlands býðst að taka raunfærnimat í heimabyggð. Á heimasíðu Austurbrúar birtist frétt þar sem m.a. var tekið viðtal við einn þátttakanda í raunfærnimati.