Náms- og starfsráðgjöf
Menntaðir náms- og starfsráðgjafar hjá Austurbrú eru tveir, báðir staðsettir í Neskaupstað en ferðast talsvert til að koma til móts við ráðþega. Einstaklingsviðtöl á árinu voru 246 og einstaklingar í hópráðgjöf 74. Öll hópviðtölin og meiri hluti einstaklingsviðtala fer fram á staðnum eða 70% en 30% viðtala fer fram í fjarumhverfi. Í ár voru konur í meirihluta ráðþega (68%) sem var óvenjulegt því síðustu ár hefur kynjahlutfallið verið mun jafnara. Fimmtungur ráðþega var með erlent ríkisfang og voru þeir samtals frá 14 löndum. Náms- og starfsráðgjafi sinnir einstaklingum sem leita til hans, að eigin frumkvæði og eftir kynningu á vinnustöðum og skjólstæðingum StarfA, bæði í formi einstaklingsráðgjafar, hópráðgjafar eða námskeiða.
Langflestir sem leita til náms- og starfsráðgjafa vilja hefja nám, oft eftir langt hlé frá námi. Viðfangsefnin eru margs konar, s.s. áhugasviðskannanir, námsframboð, inntökuskilyrði, menntakerfið, námsferill og skipulag náms, námstækni, ferilskrá, starfsþróun og raunfærnimat. Erlendir íbúar fá einnig aðstoð við að átta sig á hvaða leið þeir þurfa að fara hverju sinni til að fá nám sitt metið hér á landi.
Raunfærnimat
Náms- og starfsráðgjafi Austurbrúar sinnir raunfærnimati, bæði sem ráðgjafi og verkefnastjóri. Markmið með raunfærnimati er að meta og viðurkenna óformlegt nám og þekkingu sem fólk hefur aflað sér á vinnumarkaði. Þrjár meginleiðir eru í raunfærnimati hjá Austurbrú: raunfærnimat á móti námskrám framhaldsskóla, raunfærnimat á móti starfstengdum námskrám og raunfærnimat í almennri starfshæfni. Íbúum Austurlands býðst að taka raunfærnimat í heimabyggð.
Alls voru 40 raunfærnimöt framkvæmd hjá Austurbrú á árinu en nokkrir einstaklingar luku raunfærnimati á tveimur námsbrautum. Átta einstaklingar, allir þátttakendur hjá Starfsendurhæfingu Austurlands, luku raunfærnimati í almennri starfshæfni. Tíu luku raunfærnimati í starfi í íþróttahúsi, átta í sundlaugaverðinum, fjórir í sjúkraliða, fimm í leikskólaliða, tveir í stuðningsfulltrúa og einn í fisktækni. Austurbrú framkvæmir einnig raunfærnimat í ýmsum greinum í samstarfi við aðrar símenntunarstöðvar. Í slíku samstarfi sér náms- og starfsráðgjafi að mestu um samskiptin við einstaklinginn og aðstoðar hann í öllu ferlinu, samstarfsstöðvarnar halda utan um sjálft raunfærnimatið. Einn lauk þannig raunfærnimati í skipstjórn í samstarfi við Visku í Vestmannaeyjum og einn í matarækni í samstarfi við Iðuna.
Farsæld barna á Austurlandi
Árið 2025 hófst markviss uppbygging svæðisbundins farsældarráðs á Austurlandi í samstarfi sveitarfélaganna og Austurbrú. Ráðinn var verkefnastjóri til að undirbúa stofnun ráðsins sem byggir á lögum um samþætta þjónustu í þágu farsældar barna og miðar að því að efla snemmtækan stuðning og bæta samhæfingu þjónustu fyrir börn og fjölskyldur.
Í byrjun apríl fór fram starfsdagur í Múlaþingi, í maí var ráðstefnan Sjónaukinn haldin á Akureyri og flutti verkefnastjóri erindi þar. Í október var haldin farsældarvika á Austurlandi þar sem fræðsla og samtal um öryggi og vellíðan barna var í forgrunni. Helsti áfangi ársins var formleg stofnun Farsældarráðs Austurlands og mótun samstarfsramma með reglubundnum fundum og fræðslu. Þar hefur skapast sameiginlegur vettvangur til að vinna að fjögurra ára aðgerðaáætlun og styrkja.
- Austurland hlaðvarp: Farsældarráð
Nánar
Óstaðbundin störf
Á vefnum Austurland.is má finna upplýsingar um rými í fjórðungnum sem geta hýst óstaðbundin störf. Rýmin eru mjög fjölbreytt; allt frá því að vera hefðbundin skrifstofurými til verkstæða, vottaðrar matvælaframleiðslu, gestastofa og allt þar á milli. Rýmin má finna í vel flestum byggðakjörnum og fjölgar þeim á hverju ári.
Vorið 2025 var farið í sérstaka herferð til að auglýsa Austurland sem góðan valkost fyrir þau sem þurfa eða langar að vinna utan hefðbundinnar starfsstöðvar. Mikilvægt er að halda áfram að koma upplýsingum um þessi rými á framfæri, enda er Austurland tilvalinn kostur þegar kemur að því að bjóða upp á slík rými, þar sem í landshlutanum má finna fallega náttúru, fjölbreytt samfélög, frið og ró og sterka innviði.
Nánar
Ráðgjöf við fjármögnun
Atvinnuráðgjafar Austurbrúar fylgjast vel með þeim fjármögnunarkostum og styrkjum sem standa frumkvöðlum og fyrirtækjum til boða og veita ráðgjöf við undirbúning og fjármögnun verkefna. Veitt er ráðgjöf og aðstoð við gerð rekstraráætlana og við lánsumsóknir til Byggðastofnunar og annara fjármálafyrirtækja og veita ráðgjöf varðandi kynslóðaskipti rekstri. Austurbrú styður einnig umsækjendur við gerð umsókna í innlenda samkeppnissjóði, t.a.m. sjóði Rannís svo sem Tækniþróunarsjóð, Lóuna nýsköpunarstyrki, Matvælasjóð og sjóði á vegum Byggðastofnunar.
Austurbrú hefur jafnframt umsjón með Uppbyggingarsjóði Austurlands og veitir ráðgjöf í tengslum við umsóknir í sjóðinn. Í aðdraganda úthlutunar Uppbyggingarsjóðs eru haldnar vinnustofur í byggðarkjörnum Austurlands þar sem umsækjendur fá leiðsögn og stuðning við mótun og gerð umsókna.
Öruggara Austurland
Verkefnið er hluti af aðgerðaáætlun stjórnvalda gegn heimilisofbeldi og er það unnið í samstarfi lögreglu, barnaverndar, félagsþjónustu, heilbrigðisþjónustu, sjúkraflutninga og Austurbrúar. Lögreglan á Austurlandi leiðir verkefnið en ríkislögreglustjóri styður við það með fræðslu og samhæfingu. Austurbrú tekur virkan þátt í verkefninu og hefur verkefnisstjóri farsældar verið fulltrúi stofnunarinnar í því.
Í febrúar var haldinn fjölmennur samráðsfundur hagaðila sem hafði það að markmiði að efla samstarf, samræma verklag og styrkja viðbrögð við heimilisofbeldi og öðrum velferðarmálum í fjórðungnum. Á málþingi í október kom saman fagfólk úr heilbrigðis-, mennta-, félags- og réttarkerfinu ásamt fulltrúum sveitarfélaga. Áherslan var á forvarnir, snemmtæka íhlutun og samhæfð viðbrögð við ofbeldi meðal og gegn börnum. Málþingið var hluti af dagskrá farsældarviku sem fór fram dagana 10. til 17. október.
Uppbyggingarsjóður Austurlands
Úthlutun úr Uppbyggingarsjóði Austurlands fyrir árið 2026 fór fram í Sköpunarmiðstöðinni á Stöðvarfirði í desember 2025. Alls fengu 57 verkefni styrki en 59,3 milljónir voru til úthlutunar. Umsóknir í sjóðinn að þessu sinni voru 97 talsins; 33 umsóknir á sviði atvinnu og nýsköpunar, 60 umsóknir á sviði menningar og 4 umsóknir um stofn- og rekstrarstyrki. Heildarkostnaður þeirra verkefna sem sótt var um styrk til nam um 555 milljónum króna sem endurspeglar þann mikla metnað og kraft sem einkennir samfélagið á Austurlandi.
Af úthlutuðum styrkjum fóru 26,8 milljónir króna til 20 atvinnu- og nýsköpunarverkefna, 27 milljónir króna til 34 menningarverkefna og 5,5 milljónir króna til þriggja stofn- og rekstrarstyrkja. Um 59% umsókna hlutu styrk sem er hærra hlutfall en árið áður og endurspeglar gæði og fjölbreytni verkefnanna.
