Farsæld barna og byggðaþróun fóru saman á Sjónaukanum 2025
Á ráðstefnunni „Sjónaukinn 2025 – Farsæld í íslensku samfélagi“, sem haldin var við Háskólann á Akureyri 19.–20. maí, var meginþemað farsæld í víðu samhengi. Þar flutti Nína Hrönn Gunnarsdóttir, verkefnastjóri farsældarráðs, sameiginlega kynningu með þremur öðrum verkefnastjórum svæðisbundinna farsældarráða um hlutverk og tilurð þessara nýju samráðsvettvanga.
Nína er verkefnastjóri farsældarmála fyrir Austurland og tók þátt í að kynna hvernig innleiðing farsældarlaga fer fram í landshlutanum. Í kynningunni var lögð var áhersla á mikilvægi samþættrar þjónustu fyrir börn og fjölskyldur þeirra og að farsæld barna sé ekki einungis félagsmál heldur hreint og klárt byggðamál. Ef ekki er hlúð að börnum og byggt upp traust farsældarkerfi í sveitarfélögum getur það haft bein áhrif á byggðarþróun til framtíðar.
Í kynningunni kom fram að sveitarfélögin bera ábyrgð á innleiðingu farsældarlaga og að svæðisbundin farsældarráð gegni lykilhlutverki við að móta forgangsröðun aðgerða á hverju svæði. Á Austurlandi búa nú um 2.600 börn á aldrinum 0–18 ára og því skiptir miklu máli að byggja upp þjónustu sem nær til allra barna óháð búsetu.
Fram kom í máli Nínu að snemmtæk íhlutun, samstarf milli stofnana og hlustun á þarfir barna geti skilað gríðarlegum árangri bæði félagslega og fjárhagslega. „Það er margítrekað í rannsóknum að hver króna sem varið er í snemmtæka íhlutun skilar margföldum sparnaði,“ sagði Nína og benti á að farsæld barna væri bæði forvörn og fjárfesting í framtíð samfélagsins.
Farsældarráð Austurlands er í undirbúningi og á þeim vettvangi verður undirbúin fjögurra ára aðgerðaáætlun í samræmi við farsældarlög. Áhersla verður lögð á að skapa vettvang þar sem ólíkir þjónustuaðilar og fulltrúar samfélagsins koma saman og móta stefnu í þágu barna og framtíðaruppbyggingar.
„Ef við viljum að ungt fólk komi heim og byggi upp samfélögin okkar verðum við að tryggja að hér sé gott að alast upp,“ var meðal þess sem Nína og kollegar hennar sögðu á ráðstefnunni.
Ráðstefnan bauð upp á fjölbreytta dagskrá þar sem farsæld var skoðuð út frá samfélagslegri þátttöku, inngildingu, geðheilbrigði og framtíðarsýn. Kynningin féll vel að þeim markmiðum og undirstrikaði nauðsyn þess að byggðastefna og farsældarstefna fari saman.
Nánari upplýsingar
Nína Hrönn Gunnarsdóttir
Fleiri fréttir
Frá stofnun hefur Austurbrú unnið að fjölmörgum verkefnum á sviði menningar, markaðssetningar, atvinnuþróunar og fræðslu. Kynntu þér nýjustu tíðindin!
Skoða fréttasafn
