Þjónusta | Austurbrú

Ráðgjöf og þjónusta

Innan Austurbrúar er fjölbreytt þekking á ýmsum sviðum og bjóðum við upp á ýmis konar ráðgjöf og þjónustu til einstaklinga, fyrirtækja, sveitarfélaga og stofnana. Þrátt fyrir erfitt ár gerðum við okkar allra besta til að sinna þessu hlutverki.

Háskólaþjónusta

Austurbrú veitir þjónustu vegna háskólanáms til nemenda í fjarnámi og til háskólanna vegna nemenda á Austurlandi. Þjónustan felst í að veita nemendum möguleika á námsaðstöðu, hafa viðurkennda próftökuaðstöðu og umsýslu og veita nemendum ráðgjöf.

Nánar

Stuðningur við háskólanema

Austurbrú sinnir stuðningi við fjarnema á háskólastigi samkvæmt samningi við menntamálaráðuneytið. Stuðningurinn felst í ýmis konar ráðgjöf bæði varðandi nám og samskipti við skóla. Nemendur háskólanna geta tekið próf á starfsstöðvunum okkar og er það umfangsmesti liður háskólastuðnings en einnig er töluvert um tæknilega aðstoð s.s. vegna heimildaskráninga, notkun forrita sem gagnast við nám og tilvísanir á hina ýmsu sérfræðinga á svæðinu hvað snertir prófarkalestur og aðra námsaðstoð. Nemendur leita einnig gjarnan til Austurbrúar varðandi prófkvíða, námstækni og vegna samsetningar námsferils.

Náms- og starfsráðgjöf

Náms- og starfsráðgjöf er mjög mikilvæg fyrir fólk með litla eða enga menntun, ekki síst á landsbyggðinni þar sem menntunarstigið er almennt lægra en á höfuðborgarsvæðinu og minna um námsframboð. Náms- og starfsráðgjöf fyrir fullorðna hefur verið sinnt á Austurlandi á vegum Austurbrúar. Samningur við Fræðslumiðstöð atvinnulífsins veitir Austurbrú fjárhagslegan styrk til að sinna verkefninu.

Nánar

Raunfærnimat

Eitt af viðameiri verkefnum náms- og starfsráðgjafa hjá Austurbrú er að sinna raunfærnimati. Ráðgjafi sinnir bæði hlutverki ráðgjafa og verkefnastjóra í verkefnum Austurbrúar. Markmið með raunfærnimati er að meta óformlegt nám til eininga og staðfesta hæfni einstaklinga. Íbúum Austurlands býðst að taka raunfærnimat í heimabyggð. Minna var um raunfærnimat árið 2020 en árin á undan og féll raunfærnimat Iðunnar niður á tímabili vegna heimsfaraldursins.

Nánar

Aðstoð við fjármögnun

Austurbrú hefur umsjón með Uppbyggingarsjóði Austurlands og veitir ráðgjöf og aðra aðstoð honum tengdum. Stendur m.a. fyrir vinnustofum árlega þar sem umsækjendur fá leiðsögn í gerð góðra umsókna. Atvinnuþróunarráðgjafar okkar leitast við að fylgjast með öðrum fjármögnunarkostum og veittu ráðgjöf við gerð umsókna í fleiri sjóði, má þar nefna Nýsköpunarsjóð námsmanna, Matvælasjóð Íslands og sjóði á vegum Byggðastofnunar.

Nánar um Uppbyggingarsjóð

Nýsköpun og atvinnuþróun

Á ári hverju veita atvinnuþróunarráðgjafar Austurbrúar fjölda viðtala og veita þjónustu er snýr m.a. að fjármögnunarmöguleikum, áætlanagerð og markaðssetningu svo eitthvað sé nefnt. Tilgangurinn er að efla frumkvöðlastarf og sköpunarkraft á svæðinu og þannig stuðla að nýjum verkefnum og viðskiptatækifærum á Austurlandi. Ráðgjöfin er fyrir alla sem vilja hugsa í lausnum og leysa vandamál og áskoranir sem finnast í landshlutanum.

Ráðgjöf tengd menningarstarfsemi

Innan Austurbrúar er býr mikil reynsla þegar kemur að ráðgjöf við listafólk. Líkt og í öðrum atvinnugreinum skapaðist mikil óvissa á árinu og veitti Austurbrú fjölmörg viðtöl og ráðgjöf til að takast á við breyttan veruleika.

Verkefnisstjórn