Sterkur Stöðvarfjörður
Árið 2025 markaði tímamót í verkefninu þegar ákveðið var að framlengja verkefnið um eitt ár. Sú framlenging veitir mikilvægt svigrúm til að fylgja eftir verkefnisáætlun Sterks Stöðvarfjarðar og ljúka lykilverkefnum hennar. Af 43 skilgreindum starfsmarkmiðum verkefnisáætlunar hafa 27 náðst, 12 eru í vinnslu og fjögur óhafin. Sú staða endurspeglar raunhæfa markmiðasetningu og markvissa framkvæmd. Á árinu var áfram unnið að eflingu atvinnulífs, aukinni þátttöku íbúa og uppbyggingu innviða.
Stór áfangi náðist þegar lokið var við lagningu ljósleiðara í öll íbúðarhús á Stöðvarfirði. Sú innviðauppbygging er grundvallarforsenda nútíma atvinnu, þjónustu og búsetugæða og styrkir samkeppnishæfni staðarins til framtíðar.
Frumkvæðissjóður verkefnisins úthlutaði 11,4 milljónum króna til 15 verkefna sem styðja við framtíðarsýn staðarins og hvetja til frumkvæðis og nýsköpunar. Með sterkari innviðum, virkari þátttöku og skýrri stefnu hefur verið lagður traustur grunnur að áframhaldandi uppbyggingu.
Nánar
Fjölbreyttara atvinnulíf í dreifbýli
Áherslur verkefnisins Vatnaskila um að efla nýsköpun og stuðla fjölbreyttara atvinnulífi í dreifbýli lifa enn í starfi Austurbrúar þó því sé formlega lokið. Dæmi um þetta er efnisval á málþingi í aðdraganda Matarmóts Austurlands þar sem fyrirlesarar fjölluðu m.a. um sjálfbæran landbúnað, hæglætismatargerð, og nýsköpun í framleiðslu. Jafnframt stóð Eyglóarverkefni Austurbrúar í samstarfi við Búnaðarsamband Austurlands og Umhverfis- og orkustofnun fyrir fræðslufundaröð í desember 2025 og byrjun árs 2026 um varmadælur og orkunýtni. Í fundarröðinni var reynt að horfa sérstaklega til dreifbýlisins og var reynt að dreifa fundunum vel um Austurland.
Sjávarföll
Á árinu lauk verkefninu Sjávarföll en markmið þess var að efla sjávarbyggðir á Austurlandi og styrkja framleiðslu sjávarafurða með áherslu á sjávarhandverk. Hlaut verkefni stuðning úr C1 aðgerð byggðaáætlunar. Kortlagðir voru framleiðendur, tekin viðtöl við verkendur og unnið markvisst að þekkingaryfirfærslu, vöruþróun og samstarfi. Áhersla var lögð á tengingu við ungt matreiðslufólk m.a. nemendur í Hótel- og veitingaskólanum og nemendur í sjálfbærni við Háskóla Íslands á Hallormsstað, auk þátttöku á Matarmóti Austurlands 2025. Verkefnið leiddi jafnframt til þess að Austurbrú var boðin þátttaka í norðurslóðaverkefni um fæðuöryggi með Norður Noregi, Grænlandi, Færeyjum og Orkneyjum. Jafnframt hefur verkefnið skapað grunn að áframhaldandi þróun, nýsköpun og aukinni fullnýtingu sjávarafurða í landshlutanum.
Kynslóðaskipti í dreifbýli
Austurbrú tekur þátt í Evrópuverkefni sem snýr að kynslóðaskiptum í rekstri í dreifbýli; BOCOD – Boosting Continutiy and Digitalisation of Rural Region Businesses. Um er að ræða samstarfsverkefni sem styður litil fyrirtæki í dreifbýli til þess að efla rekstrarhæfni, tryggja samfellu í rekstri og auðvelda kynslóðaskipti. Verkefnið er styrkt af Interreg Northern Periphery and Arctic Programme en auk Íslands eru Finnland og Írland þátttökulönd. Austurbrú nýtir í verkefninu sérþekkingu sína á sviði byggða- og atvinnuþróunar og mun m.a.:
- Þróa og innleiða þjálfunaráætlanir til að efla stafræna hæfni lítilla og meðalstórra fyrirtækja á Austurlandi.
- Styðja eigendaskipti og arftakaáætlanir til að tryggja rekstrarframvindu fyrirtækja í dreifbýli.
- Kortleggja stuðningsúrræði og helstu áskoranir fyrirtækja á svæðinu.
- Miðla niðurstöðum verkefnisins og styðja innleiðingu á bestu starfsháttum í stafrænum umbreytingum og kynslóðaskiptum.
Verkefnið er til þriggja ára og hófst 1. apríl sl. Í ágúst var vinnustofa í verkefninu haldinn í Oulu í Finnlandi sem Austurbrú tók þátt í.
