Upphaf verkefnisins
Þátttaka Stöðvarfjarðar í verkefninu „Brothættar byggðir“ hófst með íbúaþingi sem haldið var á Stöðvarfirði, helgina 5.-6. mars 2022. Þetta er þrettánda byggðarlagið þar sem unnið er eftir þessu verklagi Byggðastofnunar, það þriðja á Austurlandi en áður hafa Breiðdalsvík og Borgarfjörður eystri tekið þátt. Að Brothættum byggðum á Stöðvarfirði standa Byggðastofnun, Fjarðabyggð, SSA, Austurbrú og íbúar á Stöðvarfirði. Verkefnið gengur undir heitinu „Sterkur Stöðvarfjörður“.
Nánar
Verkefnastjóri Sterks Stöðvarfjarðar
Verkefnastjórinn, Valborg Ösp Warén, er með aðsetur í Sköpunarmiðstöðinni. Hún hefur stýrt vinnu við gerð stöðugreininar, verkefnaáætlunar og haft umsýslu með úthlutun úr frumkvæðissjóði Sterks Stöðvarfjarðar.
Frumkvæðissjóður
Frumkvæðissjóðir Brothættra byggða eru styrktarsjóðir fyrir frumkvæðisverkefni á þeim svæðum sem taka þátt. Frumkvæðissjóður Sterks Stöðvarfjarðar styrkir því verkefni sem styðja ýmis konar uppbyggingu á Stöðvarfirði. Veittir eru verkefnastyrkir og stuðningur til þróunarverkefna og annarra samfélagseflandi verkefna. Athugið að ekki er krafist mótframlags frá umsækjanda. Það styrkir umsókn ef verkefnið laðar fram fjármuni og krafta aðstandenda verkefnisins og samstarfsaðila. Samstarf aðila sem að jafnaði starfa ekki saman styrkir umsóknina.
Frá upphafi hefur 81 verkefni hlotið styrk úr sjóðnum og samtals hefur verið úthlutað tæpum 52 milljónum króna. Verkefnin hafa verið sprottin upp úr hugmyndum og þörfum íbúa og mörg þeirra haft jákvæð áhrif á atvinnulíf, menningu og samfélagslíf á Stöðvarfirði.
