Verkefnið Öruggara Austurland er hluti af aðgerðaáætlun stjórnvalda gegn heimilisofbeldi og er það unnið í samstarfi lögreglu, barnaverndar, félagsþjónustu, heilbrigðisþjónustu, sjúkraflutninga og Austurbrúar. Lögreglan á Austurlandi leiðir verkefnið en ríkislögreglustjóri styður við það með fræðslu og samhæfingu.

Á fundinum komu saman um 50 fulltrúar frá ólíkum stofnunum og þjónustuaðilum sem tengjast öryggismálum og félagslegri velferð. Sérstök áhersla var lögð á að samhæfa verklag í heimilisofbeldismálum og tryggja að allir sem koma að slíkum málum – frá lögreglu og barnavernd til heilbrigðisstarfsfólks og félagsþjónustu – þekki verkferla og vinnulag. Fundinn sat líka Nína Hrönn Gunnarsdóttir frá Austurbrú en hún vinnur að stofnun farsældarráðs á Austurlandi sem leggur áherslu á snemmbæra íhlutun fjölskyldunnar í heild.

Margrét María Sigurðardóttir, lögreglustjóri á Austurlandi, segir að mikil þörf sé fyrir slíka samvinnu. „Það skiptir máli að eiga faglegt samtal milli ólíkra aðila, svo allir átti sig á hlutverki sínu og hvernig við getum unnið saman á sem skilvirkastan hátt,“ segir Margrét María. Hún nefnir einnig að sjúkraflutningamenn séu nýr hópur í þessu samráði en þeir koma stundum fyrstir á vettvang í aðstæðum þar sem ofbeldi á sér stað.

Fundargestir unnu saman að dæmisögum og tilfellagreiningum þar sem fundarmenn fóru yfir möguleg viðbrögð og samhæfingu. Að fundi loknum voru niðurstöður kynntar og rætt hvernig hægt sé að bæta samstarfið enn frekar.