Háskólagrunnur HR í boði næsta haust

„Langtímamarkmiðið er að efla virkt þekkingarsamfélag á Austurlandi.“

Samstarfssamningur um undirbúning þessa var undirritaður í september síðastliðnum og á grunni hans hefur stýrihópur unnið að verkefninu með fulltrúum frá Háskólanum í Reykjavík, Háskólanum á Akureyri, sveitarfélögunum Fjarðabyggð, Múlaþingi, Austurbrúar/SSA og fulltrúum úr sjávarútvegi og iðnaði á Austurlandi.

Samkvæmt samningnum verður boðið upp á nám í Háskólagrunni HR í háskólaútibúinu haustið 2021 og hefur nú þegar verið opnað fyrir umsóknir. Háskólagrunnur er fyrir þau sem vilja hefja háskólanám en vantar tilskilinn undirbúning. Hægt er að ljúka lokaprófi úr háskólagrunni eða viðbótarnámi við stúdentspróf og nýta sem leið inn í nám á háskólastigi. Háskólagrunnur HR er fyrsti áfanginn í uppbyggingu háskólaútibús á Austurlandi en langtímamarkmiðið er að efla virkt þekkingarsamfélag á Austurlandi.

Rektorar háskólanna, þeir Ari Kristinn Jónsson og Eyjólfur Guðmundsson, fagna þessu mikilvæga skrefi til að bæta aðgengi að háskólanámi og efla tengsl við atvinnulífið á Austurlandi. Þeir segja að skólarnir bjóði upp á fjölbreytt nám sem geti stutt við þróun þekkingarsamfélags og atvinnulíf í landshlutanum. Það sé einkar ánægjulegt að taka þátt í samhentu átaki samfélagsins, fyrirtækja, sveitarfélaga sem og ráðuneytis menntamála við að bæta aðgengi að tækninámi utan höfuðborgarsvæðisins.

Framundan er kynning á námsframboði Háskólagrunns HR á Austurlandi.

Verkefnastjóri háskólanáms á Austurlandi – starfsauglýsing

Nánari upplýsingar


Jóna Árný Þórðardóttir

470 3801 // [email protected]