ChatGPT frá A til Ö: Ertu tilbúin/n að tileinka þér gervigreind?
Gervigreind er komin til að vera og hlutverk hennar í okkar daglega lífi mun aukast gríðarlega á næstu árum. Fræðslu- og ráðgjafafyrirtækið Javelin AI í samstarfi við Austurbrú mun bjóða upp á námskeiðið „ChatGPT frá A til Ö“ í janúar og mars sem mun nýtast öllum sem vilja tileinka sér gervigreind í leik og starfi.
Gervigreind hefur umbreytt mörgum þáttum í daglegu lífi okkar, bæði í vinnu og frítíma. Fyrir mörg okkar er gervigreind hins vegar dularfullur heimur sem er spennandi en líka ógnvekjandi.
Nú gefst almenningi á Austurlandi tækifæri að læra meira um hvernig þessi tækni virkar og hvernig hægt er að nýta hana á hagnýtan hátt. Javelin AI í samstarfi við Austurbrú mun í janúar og mars bjóða upp á námskeið um gervigreind sem haldið verður á Reyðarfirði, Egilsstöðum, Djúpavogi og Vopnafirði í janúar og mars.
Nánari upplýsingar og skráning
Gríðarlega vinsæl námskeið
Sverrir Heiðar Davíðsson mun kenna á námskeiðinu en hann er höfundur námskeiðsins „Hagnýtar gervigreindarlausnir“ og stofnandi Javelin AI, fræðslu- og ráðgjafarfyrirtækis á sviði gervigreindar. Sverrir er þaulreyndur hugbúnaðarverkfræðingur með M.Sc. í gervigreind og gagnavísindum og B.Sc. í hugbúnaðarverkfræði. Hann hefur kennt þetta námskeið í meira en ár og hefur náð til rúmlega eitt þúsund manns á þeim tíma með fyrirlestrum og námskeiðum.
„Það er gaman að segja frá því að ég hef nokkuð sterk tengsl við Austurland því báðar systur mínar ákváðu að flytja á Reyðarfjörð fyrir nokkrum árum,“ segir Sverrir og er spenntur að heimsækja systur sínar þegar hann kemur austur.
Hann hefur gríðarlegan áhuga á viðfangsefninu og segir gervigreind hafa haft mikil áhrif á líf sitt:
„Já, ég held að það sé óhætt að segja það. Gervigreindin aðstoðaði mig við að stofna fyrirtæki í fyrsta skiptið,“ útskýrir hann. „Ég hef notað hana sem aðstoðarmann, sérfræðing og leiðbeinanda í gegnum allt ferlið. Ég notaði hana og nota enn til að semja, yfirfara og betrumbæta allt frá námskeiðsefni yfir í samninga og auglýsingar.“
Hann segir námskeiðið henta öllum sem hafa áhuga á gervigreind og vilja nota ChatGPT í lífi og starfi. „Námskeiðið er sérstaklega hugsað fyrir byrjendur og þau sem vilja læra á öll helstu tólin sem ChatGPT býður upp á frekar en fyrir reynda notendur sem stefna að því að dýpka sérþekkingu sína í tilteknum tæknilegum þáttum,“ segir hann.
Sverrir segir að þessir hópar gætu t.d. notið góðs af námskeiðinu:
- Stjórnendur, leiðtogar og verkefnastjórar geta lært að nýta ChatGPT til að bæta stefnumótun, skipulag, skilvirkni og teymisvinnu. Með gervigreind geta þeir einfaldað ferla og leyst flókin verkefni hraðar.
- Kennarar, þjálfarar og námsráðgjafar geta notað ChatGPT við kennslu, þjálfun og einstaklingsmiðaða þjónustu við gerð verkefna, áætlana og endurgjafar.
- Námsmenn og aðrir áhugasamir einstaklingar geta nýtt ChatGPT sem hjálparhellu í námi og til að flýta fyrir þekkingaröflun á hvaða sviði sem er.
- Fólk sem vinnur með ýmis skjöl og umsóknir getur notað ChatGPT til að auka skilvirkni og við vinnu við skýrsluskrif og við gerð samninga og útboðsgagna.
Láttu vaða!
Við hjá Austurbrú hvetjum austfirsk fyrirtæki, sveitarfélög og stofnanir að skoða námskeiðin fyrir hönd síns starfsfólks og minnum á að stéttarfélög og starfsmenntasjóðir geta létt undir kostnaði. Fyrir utan það að námskeiðið mun auka skilning nemenda á gervigreind og hvernig hún virkar þá getur þekking af þessu tagi aukið atvinnumöguleika fólks í breyttu vinnuumhverfi, aukið sjálfstraust, opnað dyr að nýjum hugmyndum og reynst hagnýtt verkfæri sem sparar tíma, eykur sköpun og einfaldar ákvarðanatöku.
Nánari upplýsingar
Ásdís Helga Bjarnadóttir
Fleiri fréttir
Frá stofnun hefur Austurbrú unnið að fjölmörgum verkefnum á sviði menningar, markaðssetningar, atvinnuþróunar og fræðslu. Kynntu þér nýjustu tíðindin!
Skoða fréttasafn
