Síðan í janúar hefur flóttafólki frá Úkraínu, sem kom austur á land í lok síðasta árs, tekið þátt í námsleið sem nefnist Landneminn. Austurbrú kennir námsleiðina fyrir hönd Vinnumálastofnunar og lauk henni á dögunum með ferðalagi nemenda um Austurland.
Námskeiðið hófst í janúar og fór kennsla fram á úkraínsku. Kennd var samfélagsfræði, sem sérstaklega var sniðin að flóttafólki og innflytjendum, en markmið Landnemans er að veita þátttakendum upplýsingar og innsýn í mikilvæga þætti sem snúa að búsetu og atvinnu á Íslandi. Athygli er beint að ýmis konar löggjöf og veittar eru gagnlegar upplýsingar um íslenskt samfélag, stofnanir og þjónustu en ekki síður um ýmsa menningartengda þætti og daglegt líf á Íslandi.
Þátttakendur á námskeiðinu voru rúmlega tuttugu og kennari var Iryna Boiko sem er líka úkraínsk. Náminu lauk um síðustu helgi og var slúttað með ferðalagi um Austurland.
Ferðalagið var skipulagt af Austurbrú, Múlaþingi og Rótarýklúbbi Héraðsbúa og var öllu flóttafólki frá Úkraínu boðið að taka þátt – ekki eingöngu nemendum námskeiðsins. Sveinn Jónsson, fyrrum forseti klúbbsins, kom inn í skipulagninguna af krafti og styrkti Rótarý ferðalagið af miklum myndarbrag. Skaffaði klúbburinn m.a. rútu, bílstjóra og sá auk þess um fararstjórn. Um hana sá Eyjólfur Jóhannsson, forseti Rótarýklúbbs Héraðsbúa.
Hópurinn var sóttur á Eiðar og á Reyðarfjörð. Fyrsta stopp var á Fáskrúðsfirði þar sem Fjóla Þorsteinsdóttir tók á móti hópnum og gekk með þeim um sýninguna Frakkar á Íslandsmiðum eða Franska safnið eins og það er kallað í daglegu tali. Að lokinni leiðsögn um safnið fór hópurinn í Gallerí Kolfreyju, þar var starfsemin kynnt og sveitarfélagið Fjarðabyggð bauð upp á hressingu.
Því næst var brunað af stað á Skíðasvæðið í Oddskarði. Veðrið var með fallegasta móti, heiðskýrt en yfir 10 stiga frost. Jóhann Benediktsson tók á móti hópnum á skíðasvæðinu og upplýsti hann um ýmis praktísk mál s.s. leigu á búnaði, gjaldskrá og ýmislegt fleira.
Hópurinn var nestaður upp í næsta áfanga með heimabökuðu bakkelsi sem nokkrar konur sem starfa í Múlanum í Neskaupstað bökuðu enda er það á almannavitorði að saddir ferðalangar eru glaðir ferðalangar.
Haldið var í Snæfellsstofu í Fljótsdal þar sem Jóhanna Lilja tók á móti hópnum og sagði þeim frá starfinu og Vatnajökulsþjóðgarði. Þá var sýningin Veraldarhjólið skoðuð.
Snæddur var kvöldverður í boði Tehússins og þar var síðan slegið upp sannkölluðu partíi. Séra Kristín Þórunn Tómasdóttir, prestur í Egilsstaðarprestakalli og meðlimur í Rótarýklúbbi Héraðsbúa, tók meðal annars lagið og hópurinn setti upp ekta úkraínskt karókí þar til honum var að lokum boðið í VÖK til að slappa af eftir langt en skemmtilegt ferðalag og vitaskuld var heimsóknin þangað í boði VÖK Baths.
Hrönn Grímsdóttir náms- og starfsráðgjafi hjá Austurbrú var verkefnastjóri Landnemans. Hún segir svona ferðalag afar þýðingarmikinn þátt í náminu:
„Við teljum að ferðalag eins og þetta geti haft mikið að segja fyrir aðlögun og vellíðan flóttafólks,“ segir hún. „Þarna fékk fólk tækifæri til að kynnast betur menningu og náttúru fjórðungsins, þau hittu fyrir margt fólk og fengu alls staðar hlýjar og góðar móttökur. Þau fengu upplýsingar frá fararstjórum um þjónustu, menningu og sögu samfélagsins og tækifæri til að spyrja. Einnig fengu þeir Íslendingar sem tóku þátt í ferðinni, á einn eða annan hátt, tækifæri til að hitta fólkið og kynnast því. Það kynntist betur innbyrðis, stækkaði félagsnetið og vonandi víkkaði það út þægindarammann!“
Austurbrú þakkar öllum þeim aðilum sem komu að framkvæmd ferðarinnar. Það var virkilega ánægjulegt að sjá hvað að allir voru jákvæðir og tóku okkur vel.
Frá stofnun hefur Austurbrú unnið að fjölmörgum verkefnum á sviði menningar, markaðssetningar, atvinnuþróunar og fræðslu. Kynntu þér nýjustu tíðindin!
Skoða fréttasafn