Austurbrú hefur umsjón með námsleiðum fyrir fólk með fötlun á Austurlandi. Fjármögnun kemur frá Fjölmennt, símenntunar- og þekkingarmiðstöð sem jafnframt sinnir ráðgjöf og stuðningi við fræðslustofnanir vegna náms og símenntunar fyrir fatlað fólk á Íslandi.
Umsjón Austurbrúar er m.a. fólgin í því að skipuleggja, auglýsa og kenna námskeið sem fötluðu fólki stendur til boða. Þá sjáum við um skráningu, útbúum og afhendum viðurkenningar svo eitthvað sé nefnt. Samstarf okkar við Fjölmennt er orðið langt og í gegnum árin hafa verið haldin fjölmörg námskeið. Núna á síðustu önn voru t.a.m. haldin fimm námskeið og voru viðfangsefnin útivist, smíði og crossfit.
Úrsúla Manda Ármannsdóttir, verkefnastjóri Austurbrúar, hefur stýrt námskeiðunum fyrir okkar hönd. Hún heimsótti nýverið starfsstöð Fjölmenntar í Reykjavík, kynnti sér starfið og hvernig kennslu er háttað. Markmiðið með heimsókninni var að fá hugmyndir til að byggja starfið fyrir austan enn frekar upp og fá ferskar hugmyndir um ný námskeið fyrir fólk með þroskahömlun og/eða á einhverfurófi.
Mynd: Úrsúla Manda og Helle Kristensen hjá Fjölmennt.
Frá stofnun hefur Austurbrú unnið að fjölmörgum verkefnum á sviði menningar, markaðssetningar, atvinnuþróunar og fræðslu. Kynntu þér nýjustu tíðindin!
Skoða fréttasafn