„Þetta er búið að vera langt en ofboðslega skemmtilegt ferli,“ segir Jóna Árný Þórðardóttir, framkvæmdastjóri Austurbrúar, en stofnunin hélt utan um vinnu við gerð Svæðisskipulags Austurlands 2022-2044 sem undirritað var í síðustu viku og naut þar góðrar aðstoðar frá ráðgjafafyrirtækinu ALTA. Hún segir spennandi tíma framundan á Austurlandi við að framfylgja markmiðum svæðisskipulagsins.
„Jú, þetta er mikill léttir,“ sagði hún að lokinni undirritun. „Þetta hefur verið langt en ofboðslega skemmtilegt ferli sem fjöldi fólks hefur komið að. Við höfum verið að ræða framtíðina, hvert erum við að fara og hvers vegna. Nú er komin niðurstaða í það samtal. Þá þarf að fara huga að næstu skrefum og vinna að þeim verkefnum sem lagt er upp með í skipulaginu.“
Eins og Jóna Árný segir var vinnan við gerð svæðisskipulagsins fyrst fremst fólgin í umræðum innan svæðisskipulagsnefndar Sambands sveitarfélaga á Austurlandi. Í henni sitja fulltrúar sveitarfélaganna auk fólks sem skipað var í nefndina og kom að málefnavinnunni sem er grunnurinn að þeim áherslum er finna má í skipulaginu. Að auki fékk naut nefndin aðstoðar ráðgjafafyrirtækisins ALTA. „Svo kynntum við málefnin reglulega fyrir hagsmunaaðilum sem höfðu tækifæri til að koma með athugasemdir og ábendingar,“ segir hún en tillaga að skipulaginu var auglýst til umsagnar sl. vor og sumar. Bárust samanlagt á fjórða tug athugasemda sem nefndin vann úr. „Þannig að það kom mikill fjöldi fólks að þessari vinnu og framtíðarsýnin sem nú liggur fyrir er afrakstur þessa samtals,“ segir hún.
Í Svæðisskipulagi Austurlands 2022-2044 er að finna stefnu og sýn sem nýtast mun við aðra áætlanagerð í landshlutanum. „Það tekur á mörgu,“ segir Jóna Árný. „Fólk getur tengt það við sín áhugasvið og sínar áherslur og núna verðum við að virkja það með okkur. Við viljum eiga góða samvinnu innan svæðisins en við viljum líka að aðilar utan landshlutans hjálpi okkur að láta framtíðarsýnina verða að veruleika. Í grunninn er meginmarkmið Svæðisskipulags Austurlands að fólki líði vel í landshlutanum og það skiptir öllu máli að fólk, heimamenn og aðrir, sjái tækifærin fyrir austan, hafi áhuga á að byggja þar upp og láta ljós sitt skína.“
Frá stofnun hefur Austurbrú unnið að fjölmörgum verkefnum á sviði menningar, markaðssetningar, atvinnuþróunar og fræðslu. Kynntu þér nýjustu tíðindin!
Skoða fréttasafn