Mánudaginn 21. mars hófst umsagnarferli við kynningartillögu Svæðisskipulags Austurlands 2022 – 2044. Svæðisskipulagsnefnd Sambands sveitarfélaga á Austurlandi, sem starfar í umboði sveitarstjórna á Austurlandi, hefur unnið hefur að tillögunni um nokkurt skeið. Tilgangur vinnunnar er að marka sameiginlega framtíðarsýn og meginstefnu sveitarfélaganna á Austurlandi til að takast á við þessar áskoranir og byggja landshlutann upp sem enn sterkari landfræðilega, hagræna og félagslega heild.

Skipulagið er tæki til breytinga

Verkefni þeirra sem bjóða sig fram til að starfa í sveitarstjórnum er ekki að viðhalda óbreyttri stöðu, heldur þróa samfélagið áfram og bæta það með öllum ráðum. Það á einfaldlega að vera skylda okkar allra að hafa jákvæð áhrif á samfélagið komandi kynslóðum til hagsbóta.

Tækið til slíkra breytinga er skipulagið. Með skipulagsvaldinu er hægt að hafa áhrif á allt það sem varðar nærsamfélagið

Skipulagsvinna sveitarfélaga teygir sig frá hinu smáa og sértæka yfir í umfangsmikla almenna stefnumótun. Útfærsla einstakra lóða og svæða er skilgreind í deiliskipulagi og aðalskipulag skilgreinir landnotkun í sveitarfélaginu öllu auk þess að fela í sér stefnumörkun um uppbyggingu og þróun sveitarfélagsins í breiðum skilningi.

Í kynningartillögu Svæðisskipulags Austurlands 2022 – 2044 birtist sameiginleg framtíðarsýn fyrir Austurland sem önnur stefnumörkun innan svæðisins mun hafa til hliðsjónar á næstu árum. Hvað viljum við varðveita og hverju viljum við breyta?

Um leið er leitast við að setja niður á blað hvað það er sem sameinar okkur. Hvað einkennir þessi sameiginlegu heimkynni okkar?

Opið samráð

Samskipti sveitarstjórnarfólks í landshlutanum einkennast af samstöðu og saga samvinnu á milli sveitarfélaga á Austurlandi er bæði löng og blómleg. Þessi samvinnuhefð er dýrmæt og án hennar hefði verið erfitt að móta sameiginlega framtíðarsýn og setja niður á blað eins og nú hefur verið gert. Sem fyrr segir er hafið opið umsagnarferli um tillöguna og er hún aðgengileg öllum í samráðsgátt stjórnvalda (samradsgatt.island.is). Breið þátttaka í umsagnarferlinu er mikilvæg og við hvetjum fólk til að kynna sér tillöguna, segja sína skoðun og koma á framfæri til okkar athugasemdum eða tillögum um það sem betur mætti fara.

Okkar ósk er sú að til verði á endanum leiðarljós fyrir Austurland, byggt á markmiðum sem þjóðir heimsins hafa sett sér, sem skila muni komandi kynslóðum samfélagi þar sem almenn lífskjör verða með því besta sem gerist.