Á miðvikudaginn var undirritaður þjónustusamningur á milli Austurbrúar og Síldarvinnslunnar um menntun og fræðslu starfsmanna fyrirtækisins. Samninginn undirrituðu Hákon Ernuson starfsmannastjóri Síldarvinnslunnar og Ásdís Helga Bjarnadóttir yfirverkefnastjóri fræðslumála hjá Austurbrú.
Samningurinn gildir til ársins 2026 og kveður á um að gerð verði fræðslu- og verkáætlun til næstu tveggja ára. Austurbrú mun meðal annars annast eftirfarandi samkvæmt samningnum:
· Greiningu á þörf fyrir sí- og endurmenntun starfsmanna Síldarvinnslunnar
· Framkvæmd og endurskoðun fræðsluáætlunar
· Náms- og starfsráðgjöf
· Framkvæmd og skipulag námskeiða
· Skráningar á námskeið í samstarfi við fulltrúa Síldarvinnslunnar
· Mat á gæðum námsþátta
Síldarvinnslan mun meðal annars annast eftirfarandi samkvæmt samningnum:
· Kynningu og upplýsingagjöf til starfsfólks
· Hvatningu til þátttöku í námskeiðum
· Miðlun upplýsinga um námskeiðahald
· Útvegun kennsluaðstöðu og aðgang að kennslukerfi
· Tryggir að nám sé unnt að stunda í vinnutíma eins og kostur er
Hákon Ernuson, starfsmannastjóri Síldarvinnslunnar, segir að umræddur samningur skipti miklu máli fyrir fyrirtækið. „Við höfum átt í farsælu samstarfi við Austurbrú og þessi samningur felur í sér áframhald þess samstarfs. Austurbrú kom til dæmis að námskeiðahaldi fyrir starfsfólk Síldarvinnslunnar síðasta vetur og þá var lögð áhersla á heilsu, næringu og svefn með það að markmiði að stuðla að jafnvægi og vellíðan. Mikil ánægja ríkti með þau námskeið. Það er tilhlökkunarefni fyrir okkur Síldarvinnslufólk að fá að njóta þeirrar fræðslu sem boðið verður upp á samkvæmt þeim samningi sem nú var verið að undirrita,“ segir hann.
Fræðsluteymi Austurbrúar hefur í gegnum tíðina tekið að sér fræðslugreiningar fyrir fyrirtæki og stofnanir á Austurlandi sem og að fylgja eftir gerð og eftirfylgni fræðsluáætlana. „Slík vinna er ávallt unnin í samráði og góðu samstarfi viðkomandi aðila,“ segir Ásdís Helga. „Þjónusta Austurbrúar s.s. náms- og starfsráðgjöf sem og mat reynslu til eininga í gegnum raunfærnimat hefur verið hluti þessarar þjónustu.“ Þorbjörg Ólöf Jónsdóttir og Hrönn Grímsdóttir, verkefnastjórar hjá Austurbrú, munu leiða verkefnið.
Mynd til hægri: Hákon og Ásdís Helga staðfestu samstarfið með undirritun samnings fyrr í vikunni.
Hrönn Grímsdóttir
Þorbjörg Ólöf Jónsdóttir
Frá stofnun hefur Austurbrú unnið að fjölmörgum verkefnum á sviði menningar, markaðssetningar, atvinnuþróunar og fræðslu. Kynntu þér nýjustu tíðindin!
Skoða fréttasafn