Tónlistarmiðstöð, í samstarfi við Austurbrú, stóð fyrir fræðsluviðburði á Egilsstöðum á mánudaginn í síðustu viku til að kynna starfsemi sína og þá þjónustu og stuðning sem tónlistarfólk og fólk sem starfar í íslenskum tónlistargeira getur sótt til hennar. Að auki var kynning á endurgreiðslum vegna hljóðritunar á tónlist á Íslandi og nýjum og efldum Tónlistarsjóði sem Tónlistarmiðstöð annast fyrir hönd menningar- og viðskiptaráðuneytisins.

Tónlistarmiðstöð hefur m.a. það hlutverk að efla og kynna íslenska tónlist á alþjóðavettvangi, tengja íslenskt tónlistarfólk við erlenda markaði og veita ráðgjöf og stuðning til tónlistarfólks og annarra sem starfa í íslenskum tónlistargeira. Miðstöðin annast umsýslu Tónlistarsjóðs en sjóðurinn veitir styrki til íslensks tónlistarfólks og verkefna með það að markmiði að styðja við þróun tónlistargeirans, efla útgáfu, tónlistarflutning og kynningu á íslenskri tónlist bæði heima og erlendis. Þá var sagt frá endurgreiðslum vegna hljóðritunar á tónlist en tónlistarfólk á Íslandi getur sótt um endurgreiðslu á kostnaði vegna hljóðritunar á tónlist á Íslandi frá menningar- og viðskiptaráðuneytinu.

• Frekari upplýsingar um Tónlistarmiðstöð á icelandmusic.is
• Frekari uppsýningar um Tónlistarsjóð icelandmusic.is/tonlistarsjodur
• Frekari upplýsingar um endurgreiðslur vegna hljóðritunar á record.iceland.is