Matur og menning á Austurlandi
Nemendur námsleiðarinnar Beint frá býli fengu að kynnast austfirskri matargerð í skemmtilegri vettvangsferð.
Vettvangsferð í Berufjörð og Djúpavog
Þriðjudaginn 23. febrúar heimsóttu þátttakendur námsleiðarinnar Beint frá býli og nemendur og starfsfólk Hallormsstaðaskóla matvælaframleiðendur í Berufirði og í þéttbýlinu á Djúpavogi. Heimsóknin var hluti af námskeiðinu sem skipulagt er af Austurbrú, eftir námskrá Fræðslumiðstöðvar atvinnulífsins, í samstarfi við Hallormsstaðaskóla sem sér um kennsluhluta námsleiðarinnar.
Fyrsti hluti heimsóknarinnar var að skoða aðstöðu hjónanna í Lindarbrekku, þeirra Bergþóru Valgeirsdóttur og Eiðs Gísla Guðmundssonar, en þau stunda hefðbundinn búskap á bænum auk þess sem þau hafa síðustu ár þróað vörur úr hreindýrakjöti, gæsabringum og ærkjöti. Hópurinn heimsótti búið, fékk að heyra sögu þeirra hjóna, skoða aðstöðuna sem þau hafa byggt sjálf frá grunni og smakka á kræsingum sem þau útbúa sjálf og selja.
Sósur og sinnep
Frá Lindarbrekku lá leiðin út á Djúpavog og þar hittu gestirnir William Óðinn Lefever en hann og sambýliskona hans, Gréta Mjöll Samúelsdóttir, stofnuðu Lefever Sauce Co. fyrir nokkrum árum. Óðinn fór yfir ferilinn við stofnun fyrirtækisins og sagði frá þeim áskorunum og tækifærum sem slíku fylgja. Óðinn gaf gestum að smakka Beru og Dreka (heitar sósur) auk þess sem hann kynnti nýtt sterkt sinnep fyrir gestum sem lofar mjög góðu.
Girnilegur heimaplatti
Næst lá leiðin í Við Voginn þar sem Rán Freysdóttir framreiddi „heimaplattann“ svokallaða en á honum má eingöngu finna mat úr Djúpavogshreppi, hinum gamla, þ.e. bopp og bylsur frá Havarí, hafsalt, grafinn þorsk frá Goðanesi, grafið kjöt frá Lindarbrekku, síld frá Ósnesi auk þess sem boðið var upp á girnilega grænmetissúpu.
Lax og fiskeldi
Næst skipti hópurinn liði. Helmingurinn fór í Búlandstind þar sem Elís Grétarsson, framkvæmdastjórinn, fór yfir starfsemi fyrirtækisins og síðan fengu gestir að ganga um vinnsluna, bæði eldri hlutann þar sem uppsjávarfiskurinn er unninn og síðan í nýja hlutann þar sem laxaslátrun fyrir Laxa og Fiskeldi Austfjarða fer fram. Mjög gaman var að sjá laxavinnsluna og alla þá nýju tækni sem þar er notuð til að tryggja ferskleika og gæði afurðanna.
Sögustund hjá steinasafnara
Hinn hópurinn fór í Steinasafn Auðuns þar sem steinasafnarinn sagði frá ástríðu sinni, af sinni alkunnu frásagnargleði, við að safna steinum og slípa. Þá sýndi hann gestum nokkra af sínum uppáhalds steinum.
Góður endir á góðum degi
Í lok dags skoðuðu gestir eggin í Gleðivík þar sem farið var yfir sögu og tilurð útilistaverksins eftir Sigurð Guðmundsson. Lokaatriði heimsóknarinnar fór fram í Tankinum í Gleðivík þar sem Helga Björk Arnardóttir, söngkona, flutti nokkur þjóðlög sem bergmáluðu og endurómuðu í tómu rýminu. Þess skal getið að Félagsbúið á Lindarbrekku, Lefever Sauce Co. og Goðanes/Grafinn þorskur hafa öll fengið styrki úr Uppbyggingarsjóði Austurlands og eru þau öll sammála því að það hafi skipt sköpum við að koma fyrirtækjunum af stað og hefja vegferðina sem þau eru öll á.
Nánari upplýsingar
Halldóra Dröfn Hafþórsdóttir
Fleiri fréttir
Frá stofnun hefur Austurbrú unnið að fjölmörgum verkefnum á sviði menningar, markaðssetningar, atvinnuþróunar og fræðslu. Kynntu þér nýjustu tíðindin!
Skoða fréttasafn
