Vinnur þar sem hún vill
Þórdís Þórarinsdóttir er starfsmaður hjá Ráðgjafarmiðstöð landbúnaðarins (RML). Hún fjarvinnur starfið á skrifstofu sinni á Vopnafirði og segir það ekki koma að sök þótt vissulega séu kostir og gallar við fjarvinnufyrirkomulagið. Það henti sér þó vel í þeim verkefnum sem hún sinnir.
Þórdís er 29 ára gömul, uppalin Skagfirðingur og útskrifuð með meistarapróf frá Landbúnaðarháskóla Íslands. Hún fékk vinnu hjá RML að loknu námi, hafði kynnst unnusta sínum í skólanum og flutti með honum til Vopnafjarðar, þaðan sem hann er, og saman búa þau á Bustarfelli ásamt þriggja ára dóttur.
„Ég vinn aðallega í ýmsum verkefnum tengdum kynbótastarfinu,“ segir Þórdís, „en það er stór þáttur í starfsemi RML. Verkefnin mín eru þess eðlis að ég vinn fyrst og fremst við skrifborðið, er mjög lítið á vettvangi. Ég sinni mínum föstu verkefnum oft ein, en svo koma líka upp tímabundin verkefni eða þróunarverkefni sem við vinnum oft í litlum teymum, auðvitað í gegnum netið. Ég hef ekki það hlutverk að vera í beinum samskiptum við bændur, aðrir sjá um það.“
„Allt sem ég geri í vinnunni fer fram í tölvunni“
Starfsmenn RML eru dreifðir um allt land og hún segist aldrei hafa upplifað það sem einhvers konar vandamál að vera ekki á ákveðinni starfsstöð. „Eftir Covid sjá allir hvað fjarvinna er einföld,“ segir hún. „Við notum Teams, tölvupóst og síma til að eiga í samskiptum við hvert annað en fólkið sem ég vinn mest með starfar allt í öðrum landshlutum en ég. Allt sem ég geri í vinnunni fer fram í tölvunni og nú til dags er hægt að vinna í einu og sama skjalinu með kannski tíu öðrum starfsmönnum í gegnum netið.“
Þórdís dregur þó ekki úr því að henni finnst gaman þegar tilefni gefast til að hitta samstarfsfólk sitt í eigin persónu. „Það er auðvitað stundum erfitt að vinna ekki við hlið kollega síns,“ segir hún en Þórdís er með skrifstofuaðstoðu á Vopnafirði og deilir henni með starfsfólki annarra vinnustaða. „Þess vegna gríp ég tækifærin og reyni að mæta á fundi tengda vinnunni þegar þeir eru haldnir suður á landi,“ segir hún. „Svo eru haldnir starfsdagar einu sinni á ári, þá hitti ég alla starfsmenn RML og það er afar skemmtilegt. Þá hittir maður líka fólkið sem maður vinnur sjaldan eða aldrei með,“ segir Þórdís en neitar því ekki að ef einhver starfsstöð RML væri nær henni myndi hún eflaust nýta sér það og „mæta stundum á skrifstofuna“.
„Það eru auðvitað kostir og gallar við fjarvinnu,“ segir hún, „en það er dásamlegt að geta búið hér á Vopnafirði og unnið við það sem ég vil vinna.“
Viltu vinna í friði og ró?
Þeim fjölgar sem stunda fjarvinnu á Austurlandi. Eftir heimsfaraldurinn varð ljóst að ýmsum störfum mátti sinna nánast hvar og hvenær sem er. Óstaðbundin störf eru reglulega auglýst og sífellt fleiri sjá tækifæri í því að breyta um umhverfi og prófa eitthvað nýtt.
Austurbrú heldur utan um vef þar sem kortlagt er húsnæði í landshlutanum er hentar vel fyrir fólk í óstaðbundnum störfum. Þar er hægt að leita að hentugu húsnæði eftir byggðakjörnum og eftir tegund húsnæðis, hvort það henti fyrir skrifstofu, viðburði, verkstæði, matvælaframleiðslu o.s.frv. Upplýsingarnar eru á ensku og íslensku.
Nánar
Fleiri fréttir
Frá stofnun hefur Austurbrú unnið að fjölmörgum verkefnum á sviði menningar, markaðssetningar, atvinnuþróunar og fræðslu. Kynntu þér nýjustu tíðindin!
Skoða fréttasafn
