Þegar Björgvin Rúnar Þorvaldsson frétti að þýska flugfélagið Condor ætlaði að hefja beint flug til Egilsstaða kviknaði hjá honum spennandi hugmynd: Að fara í einnar viku „hjólavínsmökkunarferð“ um Móseldalinn með eiginkonu sinni og vinum í september. Vínsmökkunarferð á hjóli hljómar vissulega háskalega en við höfðum samband við Björgvin sem útskýrði málið betur fyrir okkur.
Eins og við höfum sagt frá mun þýska flugfélagið Condor hefja beint flug frá Frankfurt sumarið 2023 einu sinni í viku til Egilsstaða og einu sinni í viku til Akureyrar. Munu flugin hefjast í maí 2023 og standa út október. Og það má með sanni segja að beina flugið með Condor opni á ýmis konar spennandi möguleika fyrir ferðaþyrsta Austfirðinga.
Björgvin Rúnar býr á Egilsstöðum og starfar hjá Isavia sem sér m.a. um rekstur Egilsstaðaflugvallar. Hann hjólar af kappi og sá strax möguleika á spennandi fríi en Móseldalurinn í Þýskalandi, sem er með fallegri héruðum að sækja heim, hentar afar vel til hjólreiða.
Dalurinn er nefndur eftir ánni Mósel sem liðast um dalinn eins og slanga og árbakkarnir eru skreyttir með litlum og litríkum þorpum. Einn fallegasti hluti árinnar liggur á milli borganna Trier og Koblenz, um tvö hundruð kílómetra leið, og þennan spotta ætlar Björgvin einmitt að hjóla í góðra vina hópi. Hópurinn ætlar að heimsækja helstu vínekrur á leiðinni en þær eru býsna margar á þessu svæði sem er heimsþekkt fyrir framleiðslu á gæðavíni.
„Við munum fljúga til Frankfurt, taka lest þaðan til Trier og þar er upphafspunktur ferðarinnar,“ segir hann. Hjólin leigja þau úti en túrinn er „self-guided“ og farangurinn ferjaður á milli áningastaða af ferðaskrifstofunni.
Túrinn endar svo í Koblenz og þar taka þau lest aftur til Frankfurt, þaðan sem þau fljúga aftur heim. „Það hentar afskaplega vel að geta flogið beint frá Egilsstöðum,“ segir Björgvin. „Við hefðum ekki náð að stilla þennan hóp saman á þessum tíma hefði ekki verið fyrir þetta beina flug,“ segir Björgvin en hann fer ásamt eiginkonu sinni og tveimur öðrum pörum og svo skemmtilega vill til að þau búa öll við sömu götuna á Egilsstöðum. „Þetta verða fimm hjóladagar, fremur rólegir,“ segir Björgvin en hann reiknar með að þau muni hjóla fjörutíu til sextíu kílómetra á dag. „Þetta verður rólegt, nægur tími til að fara í alls konar skoðunarferðir og svo munum við slaka vel á í lok dags og prófa einhver vín,“ segir Björgvin. „Já, það er kannski rétt að taka fram að vínsmökkunin fer fram þegar hjólreiðum dagsins er lokið,“ segir hann og hlær.
Við hvetjum ykkur til að kynna ykkur beint flug milli Austur- og Norðurlands til og frá Frankfurt. Möguleikar okkar Austfirðinga til spennandi ferðalaga hafa stóraukist með ákvörðun þýska flugfélagsins!
NánarFrá stofnun hefur Austurbrú unnið að fjölmörgum verkefnum á sviði menningar, markaðssetningar, atvinnuþróunar og fræðslu. Kynntu þér nýjustu tíðindin!
Skoða fréttasafn