Það voru Blábjörg á Borgafirði eystra, Tanni travel, Eskifirði, East Fjord Adventures/Tækniminjasafnið á Seyðisfirði, Ferðaþjónustan Mjóafirði og Adventura á Djúpavogi sem kynntu gönguferðir, gistingu og samsettar ferðir fyrir fulltrúum ferðaskrifstofa, ferðaheildsala og flugfélaga. Kynningin var í aðdraganda Mannamóta, stærstu ferðakaupstefnu landsins, sem Markaðsstofur landshlutanna standa að í janúar ár hvert. „Þátttaka í verkefninu Straumhvörf hefur verið kærkomið tækifæri fyrir einyrkja í litlu fyrirtæki til að ráðfæra sig við aðra í svipuðum rekstri, spegla hugmyndir og fá ráðgjöf og álit fagfólks,” segir Berglind Einarsdóttir, framkvæmdastjóri Adventura. Díana Mjöll Sveinsdóttir, framkvæmdastjóri Tanna Travel tekur í sama streng: „Það vantar ekki hugmyndir en oft vantar stundina og staðinn til að þær verði að einhverju meiru. Með Straumhvörfum erum við að koma hugmynd á blað, í samstarf og til kynningar. Það er spennandi tækifæri.”