Þrettán starfsmenn útskrifast úr grunnnámi í fiskvinnslu
Þrettán starfsmenn fiskimjölsverksmiðju Síldarvinnslunnar í Neskaupstað luku nýverið grunnnámi fyrir fiskvinnslufólk og var útskrift haldin 1. apríl. Um er að ræða 128 klukkustunda nám ætlað fólki sem starfar við vinnslu og verkun sjávarafla og miðar að því að efla faglega hæfni og þekkingu í starfi.
Námið er byggt á námskrá Fræðslumiðstöðvar atvinnulífsins og er á 1. þrepi hæfniramma íslensks menntakerfis. Það skiptist í 13 námsþætti þar sem meðal annars er fjallað um vinnsluferla, gæði og meðferð matvæla, öryggismál, hreinlæti og innra eftirlit í fiskvinnslu. Einnig er lögð áhersla á umhverfismál, ábyrgð í fiskveiðum og samskipti á vinnustað.
Kennslan fór fram bæði í rafrænu kennsluumhverfi Learncove og með staðbundnum lotum á vinnustaðnum.
Fræðsla sem nýtist beint í starfi
Markmið námsins er að auka skilning þátttakenda á allri virðiskeðju sjávarafurða – allt frá veiðum til neytenda – og styrkja hæfni þeirra til að fylgja verkferlum, tryggja gæði og vinna samkvæmt kröfum um öryggi og hreinlæti. Þá er einnig lögð áhersla á að efla sjálfstraust og samskiptafærni starfsfólks.
Námið er sérstaklega sniðið að fullorðnum námsmönnum sem hafa stutta formlega skólagöngu að baki og býður upp á möguleika á mati til eininga á framhaldsskólastigi.
Útskriftin markar því mikilvægan áfanga fyrir þátttakendur sem hafa með náminu styrkt stöðu sína á vinnumarkaði og aukið hæfni sína til starfa í íslenskri fiskvinnslu.
Fleiri fréttir
Frá stofnun hefur Austurbrú unnið að fjölmörgum verkefnum á sviði menningar, markaðssetningar, atvinnuþróunar og fræðslu. Kynntu þér nýjustu tíðindin!
Skoða fréttasafn
