Sigrún Jóhanna Þráinsdóttir, fulltrúi frá Áfangastaðastofu Austurlands, tók á dögunum þátt í kynningarviðburðum á vegum Íslandsstofu á Spáni og í Bretlandi. Áherslan var á að kynna Austurland sem fjölbreyttan og aðlaðandi áfangastað utan háannatíma.

Dagana 28.–30. október voru vinnustofur í Málaga, Valencia og Madríd þar sem Sigrún Jóhanna hitti fulltrúa frá um tuttugu ferðaskrifstofum. „Ferðaskrifstofurnar heilluðust algjörlega af náttúrunni, norðurljósunum og hreindýrunum. Stuðlagil og helstu fossar Austurlands vöktu einnig mikla athygli,“ segir hún.

Sigrún Jóhanna bendir á að þekking á Íslandi hafi verið meiri í Madríd en í hinum borgunum og að enska sé ekki alltaf sjálfgefið samskiptamál í suðausturhluta Spánar. „Það skipti miklu að geta kynnt svæðið á spænsku og útskýrt hvað gerir Austurland svona sérstakt,“ segir hún.

Markmiðið með ferðinni var að kynna Austurland og nálgast betur ört vaxandi markhóp spænskra ferðamanna sem leita í síauknum mæli til Íslands.

Ný greining Hopscotch Tourism: Spánverjar velja jaðartímann

Á vinnustofunum var jafnframt kynnt ný greining Hopscotch Tourism á ferðavenjum Spánverja sem íhuga Íslandsferðir lengri en fimm daga. Þar kemur m.a. fram:

• September er vinsælasti ferðamánuðurinn (21,11%).
• Næst koma apríl (13,89%) og október (12,78%) — báðir jaðartímamánuðir þar sem verð eru hagstæðari og færri ferðamenn á ferðinni.
• Sterkur áhugi er á litlum og sérstöku stöðum (74,1%), menningu og sögulegum svæðum (71,4%).
• Náttúru- og útivistarupplifanir (62,6%) og matartengd upplifun (62,3%) skipta ferðamenn miklu.

Niðurstöðurnar falla vel að áherslum Visit Austurlands um að kynna svæðið yfir jaðar- og vetrarmánuði og hvetja til lengri dvala.