Björn Hafþór Guðmundsson er einn af þeim sem mótuðu starf Sambands sveitarfélaga á Austurlandi (SSA) í áratugi bæði sem formaður og framkvæmdastjóri. Í nýjum þætti í Austurland hlaðvarp ræðir hann við Jón Knút Ásmundsson um hlutverk og þróun SSA frá því hann mætti á sinn fyrsta aðalfund árið 1974 og fram til ársins 2010, þegar hann lét af störfum sem framkvæmdastjóri.

Björn Hafþór kom ungur inn í sveitarstjórnarmálin og segist hafa verið „blautur á bak við eyrun“ þegar hann sat sína fyrstu fundi á vettvangi SSA sem fulltrúi Stöðvarfjarðar. Hann lýsir fundunum sem kraftmiklum, fullum af sterkum persónuleikum og hörðum orðaskiptum en áréttar að andinn hafi jafnan verið góður þegar fundum lauk. Vettvangurinn hafi reynst mörgum góður skóli og leið til að kynnast landshlutanum, hann hafi lært af öðrum og orðið ófeimnari við að tjá sig en ella. Björn rifjar upp vinnu við hagsmunagæslu gagnvart ríkisvaldinu en starf SSA, þá eins og nú, snerist að stórum hluta um að fylgja eftir ályktunum SSA. Hann rifjar líka upp að sveitarfélögin voru talsvert fleiri en í dag og þá þurfti að „sleikja mörg frímerki“ eins og þessi alkunni húmorisi orðar það í spjallinu.