Hvernig lærir fólk að starfa með öðrum í pólitík? Hvað þarf til að taka sæti í sveitarstjórn? Hvert stefnir Austurland? Þessar spurningar eru meðal þess sem Jón Knútur Ásmundsson ræðir við Stefán Boga Sveinsson, héraðsskjalavörð og fyrrum bæjarfulltrúa, í nýjum hlaðvarpsþætti hjá Austurbrú. 

Stefán Bogi er forstöðumaður Héraðsskjalasafns Austurlands en margir þekkja hann einnig úr sveitarstjórnarmálum. Hann sat um árabil í sveitarstjórn, tók þátt í starfi SSA og var formaður svæðisskipulagsnefndar Austurlands á lokaspretti þeirrar vinnu.

Í þættinum rifjar hann upp hvernig hann kom sjálfur inn í pólitíkina, ungur að árum og fullur áhuga. Hann segist ekki hafa farið af stað vegna eins afmarkaðs baráttumáls heldur einfaldlega vegna þess að hann taldi sig eiga erindi inn á vettvanginn. „Ég vildi bara vera í þessu umhverfi,“ segir hann og bætir við að hann hafi fundið að þar gæti hann gert gagn.

Stefán Bogi segir sveitarstjórnarstörf gefandi en líka krefjandi. Verkefnið taki tíma og því sé skiljanlegt að margir hiki við að gefa kost á sér. Þá hafi hann sjálfur lært mikið af samstarfi við annað fólk. „Erfiðasti skólinn var samvinna við annað fólk,“ segir hann og nefnir að stærsta lexían hafi verið að hlusta betur, treysta öðrum og læra að leiða án þess að þurfa að stjórna öllu.