Stjórnendur á sjó hjá Síldarvinnslunni sátu á dögunum námskeiðið Sterk teymi. Námskeiðið, sem er hluti af fræðsluáætlun SVN og framkvæmt í samstarfi við Austurbrú, fjallaði meðal annars um hvernig teymi byggja upp traust, nýta styrkleika allra og taka betri ákvarðanir á skemmri tíma. Hjálmar Ólafur Bjarnason, skipstjóri á Gullver NS, og Lúðvík Emil Arnarsson (Lúlli), stýrimaður á frystitogaranum Blæng NK, voru meðal þátttakenda og segja að fræðslan hafi bæði verið gagnleg og greinilega sniðin að þeirra þörfum.

„Símenntun í sjómennsku er orðin nauðsynleg,“ sagði Hjálmar. „Með hverju árinu verður skýrara að við þurfum reglulega á fræðslu að halda, bæði vegna faglegra krafna og til að efla samskiptin sem starfið byggir á.“

Lúlli tekur undir þetta og segir að svona námskeið eins og „Sterk teymi“, geti minnt mann á að staldra við og skoða eigið starf í nýju ljósi. „Maður lærir alltaf eitthvað nýtt, sama hversu lengi maður hefur unnið í sama starfinu,“ sagði hann, „og ég hef trú á að þetta námskeið muni nýtast bæði um borð og í daglegu lífi. Ef samskipti batna, batnar eiginlega allt.“

Hjálmar tekur undir og segir að svona námskeið hafi verið kærkomið tækifæri til að stíga út úr rútínunni. „Við vinnum mikið saman og stundum í löngum törnum. Þá skiptir miklu að samskipti og traust séu í lagi.“

Þeir benda á að það sé ekki sjálfgefið að sjómenn komist á námskeið vegna eðli vinnunnar. Sveigjanlegt fyrirkomulag námsskipulagsins hafi hjálpað mikið. „Já, maður finnur að verið er að koma til móts við okkur,“ bætir Lúlli við. „Það skiptir máli, því vinnuumhverfið okkar er ólíkt flestum öðrum.“