Ertu með hugmynd?
Stuðningur úr Frumkvæðissjóð Sterks Stöðvarfjarðar getur skipt sköpum. Auglýst er eftir umsóknum í síðasta sinn.
Frestur er til og með 10. febrúar.
Sæktu um!„Frumkvæðissjóðurinn gaf mér hugrekki til að láta vaða“
Í tengslum við síðustu úthlutun Frumkvæðissjóðs Sterks Stöðvarfjarðar, sem sagt var frá í síðustu viku, eru mörg verkefni sem sýna vel hvaða áhrif sjóðurinn getur haft þegar hugmyndir fá byr undir báða vængi. Eitt þeirra eru Heilsueflingardagar á Stöðvarfirði, sem haldnir voru vorið og haustið 2024, að frumkvæði Solveig Friðriksdóttir, kennara, jógakennara og samfélagsþegns á Stöðvarfirði.
Solveig er fædd og uppalin á Stöðvarfirði og flutti aftur heim eftir háskólanám í sálfræði árið 1998. Þar stofnaði hún fjölskyldu, starfaði sem kennari við Stöðvarfjarðarskóla í tæp tuttugu ár og hefur samhliða því byggt upp fjölbreytta starfsemi á sviði heilsueflingar, jóga, slökunar og fræðslu.
„Ég hef alltaf haft mikinn áhuga á sjálfseflingu og lífsleikni,“ segir Solveig. „Ég kenndi jóga í skólanum síðustu árin mín í kennslu og hef verið með námskeið fyrir bæði börn og fullorðna í gegnum árin. Þetta hefur alltaf verið rauði þráðurinn hjá mér.“
Frá hugmynd að framkvæmd
Solveig sótti fyrst um styrk úr Frumkvæðissjóði Sterks Stöðvarfjarðar til að þróa áfram handunna slökunarpúða sem hún hafði saumað og selt í litlu magni í tæpan áratug. Með styrknum gat hún fjárfest í betri saumavél og kynnt vöruna markvisst, sem jók framleiðslu og sýnileika verulega.
Í kjölfarið sótti hún um styrk til að halda Heilsueflingardaga á Stöðvarfirði. „Mig hafði lengi dreymt um að bjóða upp á svona viðburð hér heima á viðráðanlegu verði,“ segir hún. „Styrkurinn gerði það mögulegt. Annars hefði allur kostnaður lent á mér og þetta líklega aldrei orðið að veruleika.“
Heilsueflingardagarnir voru byggðir upp sem heildstæð upplifun. Dagskráin hófst á jógagöngu – núvitundargöngu í kyrrð með völdum jóga- og öndunaræfingum – og hélt áfram með fræðslu um mikilvægi slökunar í daglegu lífi, nærandi máltíðir og djúpslökun með kakói og tónskálum.
Þátttakendur komu ekki aðeins frá Stöðvarfirði heldur einnig frá nágrannabyggðum og margir þekktust ekki áður. „Það myndaðist mjög falleg tenging í hópnum,“ segir Solveig. „Fólk upplifði frið, ró og samhljóm – og samtölin í hléunum urðu ótrúlega dýrmæt.“
Viðbrögð þátttakenda voru afar jákvæð. Margir nefndu að þeir hefðu lært hversu mikilvægt væri að gefa sér tíma til slökunar og að dagurinn hefði haft raunveruleg áhrif á líðan þeirra, svefn og daglegt jafnvægi.
Solveig segir svona verkefni skipta miklu máli fyrir lítil samfélög. „Þegar fólk kemur hingað úr öðrum fjörðum sér það hvað Stöðvarfjörður er fallegur og friðsæll staður. Þetta smitar út frá sér. Minn draumur er að Stöðvarfjörður komist á kortið sem einhvers konar heilsuparadís.“
Hún telur að jákvæð umfjöllun, gestakomur og viðburðir styrki bæði samfélagið og sjálfsmynd staðarins. „Við höfum svo margt að gefa – náttúruna, kyrrðina og andrúmsloftið.“
Breytti miklu
Aðspurð hvort verkefnin hefðu orðið að veruleika án styrksins er svarið skýrt. „Nei,“ segir Solveig. „Styrkurinn var ekki bara fjárhagslegur stuðningur heldur líka hvatning. Hann gaf mér hugrekki til að stíga út fyrir þægindarammann og láta vaða.“
Í kjölfarið fór hún í frekara nám í áfallamiðuðu jóga og síðar í 9D Breathwork, sem hún lýsir sem einu magnaðasta verkfæri sem hún hafi kynnst í eigin heilsueflingu. Í dag er hún farin að halda námskeið, bæði staðbundið og á netinu, samhliða því að huga áfram að eigin heilsu. „Ég er enn í fullu starfi við að safna heilsu,“ segir hún. „Hugurinn er oft á undan líkamanum – en þetta er allt hluti af ferðalaginu.“
Dæmi um það sem sjóðurinn á að gera
Saga Solveigar er eitt af mörgum dæmum um hvernig Frumkvæðissjóður Sterks Stöðvarfjarðar hefur stutt við hugmyndir sem spretta úr samfélaginu sjálfu og skapa raunveruleg áhrif – bæði fyrir einstaklinga og byggðina í heild.
Sem fyrr segir stendur nú yfir síðasta úthlutun Frumkvæðissjóðs Sterks Stöðvarfjarðar og er opið fyrir umsóknir til og með 10. febrúar. Nánari upplýsingar, umsóknareyðublöð og leiðbeiningar má finna á vef Austurbrúar.
Fleiri fréttir
Frá stofnun hefur Austurbrú unnið að fjölmörgum verkefnum á sviði menningar, markaðssetningar, atvinnuþróunar og fræðslu. Kynntu þér nýjustu tíðindin!
Skoða fréttasafn
