Haustfögnuður og hvatningarverðlaun
Aðalheiður Ósk Guðmundsdóttir, framkvæmdastjóri Vök Baths, og Friðrik Árnason, hjá Hótel Breiðdalsvík og Travel East, hlutu hvatningarverðlaun ferðaþjónustunnar sem voru veitt við hátíðlegt tilefni á Tehúsinu, Egilsstöðum, á dögunum.
Frumkvöðullinn og Kletturinn
Þann 2. nóvember komu ferðaþjónustuaðilar á Austurlandi saman og gerðu sér glaðan dag í kjölfar vinnustofunnar Straumhvörf. Vinnustofuna sóttu 33 ferðaþjónustuaðilar víðsvegar af Austurlandi þar sem vöruþróun yfir vetrarmánuðina og hvernig megi lengja ferðamannatímabil í landshlutanum voru helstu viðfangsefni. Að vinnustofu lokinni áttu þátttakendur notalega stund saman í Vök Baths áður en haldið var á Gistihúsið í þriggja rétta kvöldverð. Því næst lá leiðin á Tehúsið þar sem hvatningarverðlaun ferðaþjónustunnar voru veitt en þau voru endurvakin eftir sex ára dvala árið 2021.
Frumkvöðullinn
Viðurkenning þessi er veitt þeim aðilum sem sýna áræðni og hugmyndaauðgi við uppbyggingu á þjónustu fyrir ferðamenn og stuðla með verkum sínum að aukinni fjölbreytni í atvinnugreininni á Austurlandi. Með framtaki sínu og frumkvæði ryðja þeir brautina og eru öðrum sem vinna við ferðaþjónustu nauðsynleg hvatning til dáða.
Aðalheiður Ósk Guðmundsdóttir, hjá Vök Baths, hlaut viðurkenninguna að þessu sinni. Hún hefur undanfarin þrjú ár verið mikill drifkraftur í austfirskri ferðaþjónustu. Aðalheiður hefur verið áberandi í umræðunni, staðið fyrir viðburðum og vinnustofum og stuðlað að vöruþróun meðal austfirskra ferðaþjónustufyrirtækja. Hún hefur lagt mikið upp úr samstarfi við ferðaþjónustufyrirtæki í landshlutanum og tekið virkan þátt í samstarfsverkefnum.
Kletturinn
Viðurkenning þessi er veitt þeim aðilum sem um árabil hafa staðið í framlínu ferðaþjónustu á Austurlandi og með ósérhlífni og eljusemi stuðlað að framgangi og vexti atvinnugreinarinnar. Þeir eru bjargið sem ferðaþjónustan byggir á og eru öðrum fyrirmynd í að klífa örðuga hjalla til að ná handfestu á framtíðinni.
Friðrik Árnason, hjá Hótel Breiðdalsvík og Travel East, hlaut Klettinn að þessu sinni. Friðrik hefur starfað í ferðaþjónustu í rúmlega þrjátíu ár. Undanfarin fjórtán ár hefur hann byggt upp öfluga ferðaþjónustu á Breiðdalsvík eða frá því að hann festi kaup á Hótel Bláfelli (nú Hótel Breiðdalsvík) árið 2009. Þá hefur Friðrik komið að uppbyggingu Kaupfjelagsins á Breiðdalsvík ásamt því að ráðast í endurbætur á gamla frystihúsinu í samstarfi við Byggðastofnun. Gamla frystihúsið hýsti lengi vel bílasafn en þjónar í dag hlutverks viðburða- og ráðstefnusals. Friðrik hefur haft sjálfbærni að leiðarljósi í öllum sínum rekstri og hlaut Hótel Breiðdalsvík hvatningarverðlaun Ábyrgrar ferðaþjónustu fyrir vel ígrundaða sjálfbærnistefnu.
Friðrik hefur verið ötull talsmaður Austurlands í gegnum árin og sótt fjölda ferðasýninga og vinnustofa innanlands sem og erlendis í þeim tilgangi að kynna landshlutann fyrir áhugasömum ferðaskrifstofum og lengja ferðamannatímabilið.
Austurbrú óskar Aðalheiði og Friðriki kærlega til hamingju með viðurkenninguna og við hlökkum til áframhaldandi vinnu með þeim báðum!
Nánari upplýsingar
Sigfinnur Björnsson
Fleiri fréttir
Frá stofnun hefur Austurbrú unnið að fjölmörgum verkefnum á sviði menningar, markaðssetningar, atvinnuþróunar og fræðslu. Kynntu þér nýjustu tíðindin!
Skoða fréttasafn
