Ef Seyðisfjörður gæti talað!
Komdu í Herðubreið 30. apríl og taktu þátt í opnu samtali um framtíð menningarlífsins á Seyðisfirði. Vinnustofan er liður í rannsókn sem gefur rými fyrir hugmyndir, vonir og ímyndunarafl íbúanna sjálfra.
Viðburður á FacebookHvert skal haldið – Vinnustofa um framtíð menningar á Seyðisfirði
Þriðjudaginn 30. apríl kl. 15:00–18:00 verður haldin opin vinnustofa í Herðubreið á Seyðisfirði þar sem menningarlíf staðarins verður tekið fyrir með opnum huga og spurt: Hvert skal haldið?
„Við ætlum að taka samtalið alla leið,“ segir Hlín Helga Guðlaugsdóttir, hönnuður og sýningarstjóri, sem ásamt samstarfsaðila sínum Michael Hendrix, leiðir þetta nýstárlega rannsóknarverkefni um framtíð menningar á Seyðisfirði og felur í sér að virkja íbúa til þátttöku í að móta framtíðarsýn.
„Þetta snýst allt um að komast að því hvað fólk vill. Hvernig framtíð langar okkur í? Við ætlum ekki að segja til um neitt – við ætlum að hlusta. Við erum bara „auðveldarar“ í þessu ferli,“ segir Hlín. „Markmiðið er að lyfta hugmyndum íbúa og skapa vettvang þar sem ólík sjónarmið geta hist.“
Dagskrá vinnustofunnar:
15:00 – 16:30 Kortlagning og mótun framtíðarsviðsmynda
16:30–18:00 Samantekt, samtal og drykkir
Vinnustofan fer að mestu leyti fram á ensku og er öllum opin. Þátttakendur geta tekið þátt í báðum hlutum eða þeim hluta sem hentar hverjum og einum.
Hvers vegna Seyðisfjörður?
„Ég hef alltaf haft einhvern óútskýranlegan áhuga á Seyðisfirði,“ segir Hlín. „Kanski er það í genunum – afi minn var að austan – en mér fannst líka spennandi að skoða stöðu menningarlífsins í dag í ljósi þeirra umbreytinga sem samfélagið hefur gengið í gegnum á síðustu árum.“
Hlín segir að Seyðisfjörður sé með öflugan grunn þegar kemur að menningu og listum en að mikilvægt sé að hlusta á íbúana sjálfa um hvert þeir vilja stefna:
„Við þurfum að hugsa: Hvernig getur menning verið burðarás samfélagsins áfram? Og hvernig getur hún tengst öðrum þáttum – nýsköpun, menntun, ferðaþjónustu, sjálfbærni – á skapandi og hagnýtan hátt?“
Framtíðin byrjar í samtalinu
Verkefnið „Hvert skal haldið?“ hófst síðasta haust með vettvangsrannsóknum og viðtölum við íbúa. Vinnustofan í Herðubreið er næsti liður og niðurstöðurnar verða síðan unnar áfram og kynntar síðar á árinu.
„Við viljum að þetta verði ekki bara tilviljanakennt samtal sem hverfur. Við viljum búa til farveg þar sem hugmyndir geta dafnað og orðið að einhverju – ekki endilega stórum hugmyndum, heldur raunverulegum.“
Hvort sem þú ert fastagestur á tónleikum, áhugamaður um sögu staðarins, íbúi á Seyðisfirði eða einfaldlega manneskja sem vill hafa áhrif þá eru öll velkomin á vinnustofuna.
Verkefnið „Hvert skal haldið?“ er styrkt af Austurbrú, Miðstöð menningarfræða á Seyðisfirði (MMF) og Hönnunarsjóði Íslands en það nýtir aðferðir hönnunar og framtíðarfræða til samfélagslegrar ímyndunar.
Nánari upplýsingar veitir Hlín Helga í síma 699 7733 // [email protected]
Fleiri fréttir
Frá stofnun hefur Austurbrú unnið að fjölmörgum verkefnum á sviði menningar, markaðssetningar, atvinnuþróunar og fræðslu. Kynntu þér nýjustu tíðindin!
Skoða fréttasafn
