Menningarfulltrúar landshlutasamtakanna heimsækja Austurland
Dagana 3. og 4. júní fengu Austfirðingar góða gesti þegar menningarfulltrúar landshlutasamtakanna af öllu landinu heimsóttu svæðið. Fulltrúarnir komu frá Suðurlandi, Suðurnesjum, Vesturlandi, Vestfjörðum, Norðurlandi vestra og Norðurlandi eystra og var menningarfulltrúi Austurlands gestgjafi að þessu sinni. Þessi heimsóknir hafa tíðkast um árabil og er markmiðið að efla tengsl og miðla þekkingu og innblæstri á milli landshluta.
Dagskráin var þétt skipuð en um leið afar skemmtileg og fróðleg. Á Egilsstöðum heimsóttu þau Sláturhúsið og Minjasafnið og fengu gestirnir innsýn í starfsemina og söguna sem liggur að baki þessum menningarstofnunum.
Neskaupstaður, Stöðvarfjörður og skapandi uppbygging
Í Neskaupstað var farið í Þórsmörk, gamalt hús sem nú hefur fengið nýtt líf sem vettvangur fyrir listamenn í listamannadvöl og ungt fólk í skapandi sumarstörfum. Þar er einnig sýningarrými fyrir listir og skrifstofur menningafulltrúa Fjarðabyggðar. Anna Karen verkefnastjóri í Menningarstofu Fjarðabyggðar leiddi leiðsögnina. Einnig var farið í Safnahúsið sem hýsir þrjú söfn; Myndlistarsafn Tryggva Ólafssonar, Sjóminja- og smiðjusafn Jósafats Hinrikssonar og Náttúrugripasafnið.
Á Stöðvarfirði heimsótti hópurinn Sköpunarmiðstöðina sem nýverið hlaut hin virtu menningarverðlaun Eyrarrósina – viðurkenningu fyrir framúrskarandi menningarstarf á landsbyggðinni. Leiðsögn um húsið var í höndum Kris, nýs framkvæmdastjóra, auk þess sem Lukasz hjá Kaffi Kvörn og Valborg, verkefnastjóri Sterks Stöðvarfjarðar, tóku vel á móti gestum. Þar gafst einnig kostur á að smakka ljúffengt kaffi og rabbarbarakökur frá Brauðdögum Deighúsi. Þá var farið í Salthúsmarkaðinn þar sem handverksfólk úr heimabyggð selur vörur sínar og endaði hópurinn í Gallerí Snærós þar sem mæðgurnar Sólrún og Rósa fóru yfir sína starfsemi og listsköpun.
Seyðisfjörður og sameining listar, menningar og tækni
Á Seyðisfirði var byrjað á heimsókn í Herðubreið þar sem Sesselja sagði frá endurbyggingu hússins og kynnti verkefnið List í ljósi. Þá var rætt um vetrareknar bíósýningar Herðubíós. Í framhaldinu var Lunga skólinn heimsóttur þar sem Heiðdís tók á móti okkur og hópurinn fræddist um starfsemi hans áður en haldið var í Skaftfell. Þar tóku Celia Harrison og Anna Margrét á móti gestunum og fóru yfir verkefni og hlutverk stofnunarinnar.
Síðasta heimsókn dagsins var í Tækniminjasafnið þar sem Elfa Hlín og Jónína tóku á móti hópnum. Þær greindu frá sögu safnsins og þeim miklu breytingum sem eru í vændum, en flutningur og endurbygging hússins Angrós er á döfinni þar sem nýtt og endurbætt safn mun taka til starfa.
Fróðlegt, skemmtilegt og ljúffengt
Heimsóknin var ekki aðeins gagnleg og fræðandi heldur einnig einstaklega ánægjuleg. Hópurinn ferðaðist saman í langferðabíl sem gaf gott rými fyrir samtöl og tengslamyndun. Maturinn var einnig í hávegum hafður – á Hildibrand var stoppað í frábæru hádegisverðarhlaðborði, í Löngubúð var boðið upp á gúllassúpu og grænmetissúpu og á Nielsen restaurant var matseðillinn fjölbreyttur og spennandi.
Fram undan er áframhaldandi samstarf þar sem hópurinn hyggst vinna að mótun hraðals fyrir skapandi greinar. Það verður spennandi að fylgjast með þeirri vegferð og vonandi mun áhugi og þátttaka tryggja að verkefnið fái að blómstra.
Svipmyndir frá heimsókninni
Fleiri fréttir
Frá stofnun hefur Austurbrú unnið að fjölmörgum verkefnum á sviði menningar, markaðssetningar, atvinnuþróunar og fræðslu. Kynntu þér nýjustu tíðindin!
Skoða fréttasafn
