Nemendur í framhaldsnámi við stóriðjuskóla Alcoa Fjarðaáls fóru nýverið í vettvangsferð til Reykjavíkur þar sem þeir kynntu sér bæði atvinnulíf og möguleika til áframhaldandi náms. Hópurinn mun útskrifast úr náminu í lok apríl.

Á fyrri degi ferðarinnar heimsóttu nemendur Norðurál á Grundartanga þar sem þeir fengu kynningu á starfsemi fyrirtækisins og skoðuðu vinnsluna. Þar fengu þeir meðal annars innsýn í þær áskoranir sem fylgdu bilun í spennum í október síðastliðnum og hvernig unnið hefur verið að endurreisn framleiðslunnar, þar sem nú er hafin endurræsing á kerum.

Seinni daginn lá leiðin í Háskólann í Reykjavík þar sem nemendur fengu kynningu á fjölbreyttum námsleiðum, meðal annars í háskólagrunni, iðnfræði og tæknifræði. Þá fengu þeir að skoða aðstöðu skólans, þar á meðal verkstæði og rannsóknarrými.

„Slíkar vettvangsferðir eru afar mikilvægar fyrir nemendur, þar sem þeir fá bæði innsýn í starfsemi iðnfyrirtækja og tækifæri til að átta sig betur á þeim möguleikum sem standa þeim til boða í námi og starfi. Það skiptir líka máli að sjá hvernig sambærileg starfsemi er unnin á ólíkum stöðum, kynnast mismunandi nálgun og lausnum og fá þannig breiðari sýn á fagið og eigin framtíðarmöguleika. Svo skiptir ekki síður máli að fá tækifæri til að fara saman í svona ferð, kynnast betur og eiga góðar stundir,“ segir Þorbjörg Ólöf Jónsdóttir, verkefnastjóri stóriðjuskólans hjá Austurbrú.