Innviðaráðuneytið og Byggðastofnun, í samstarfi við Austurbrú, boða til samráðsfundar um endurskoðun byggðaáætlunar. Fundurinn verður haldinn miðvikudaginn 16. apríl kl. 16:00–17:30 á Vonarlandi á Egilsstöðum.

Tilgangur fundarins er að kynna fyrstu drög að endurskoðaðri byggðaáætlun, með sérstakri áherslu á aðgerðaáætlun hennar. Fulltrúar ráðuneytisins og Byggðastofnunar munu fara yfir helstu áherslur í drögunum og kalla eftir sjónarmiðum og umræðu frá fundargestum. Markmiðið er að skapa vettvang fyrir opið samtal um framtíð byggðaþróunar og tryggja að raddir ólíkra svæða og hagsmunaaðila fái að heyrast á þessu mikilvæga stigi vinnunnar.

Ábendingar og umræður sem fram koma á fundinum munu nýtast við áframhaldandi mótun áætlunarinnar og verða meðal annars hafðar til hliðsjónar við gerð svokallaðrar hvítbókar sem stefnt er að því að birta í samráðsgátt stjórnvalda í lok maí. Með því gefst enn frekara tækifæri til að koma á framfæri sjónarmiðum áður en endanleg tillaga verður lögð fram.

Fyrir fundinn verður jafnframt opnað fyrir rafrænt samráð um drögin á vef Byggðastofnunar. Fundargestir eru hvattir til að kynna sér efnið vel fyrir fram, en gert er ráð fyrir að drögin verði birt fyrir páska. Með því skapast betri grundvöllur fyrir markvissar umræður og gagnlegar ábendingar á fundinum sjálfum.

Byggðaáætlun er eitt mikilvægasta stefnumótandi tæki stjórnvalda þegar kemur að þróun byggðar og jafnvægi milli landshluta. Endurskoðun hennar hefur því víðtæk áhrif á samfélög, atvinnulíf og lífsgæði um land allt. Þátttaka í samráði af þessu tagi er því lykilatriði til að tryggja að áætlunin endurspegli raunverulegar þarfir og tækifæri á hverju svæði.

Fundurinn er opinn öllum sem láta sig byggðaþróun varða og eru áhugasamir hvattir til að mæta á staðinn eða taka þátt í gegnum Teams. Skráning er nauðsynleg.

Taktu þátt í samtalinu um framtíð byggðar – þín rödd skiptir máli.