Haustþingið samþykkti ályktun þar sem lögð er rík áhersla á að tryggja íbúum Austurlands greiðan aðgang að öflugri geðheilbrigðisþjónustu til jafns við aðra landsmenn, krafist er tafarlausra framkvæmda við hringtengingu með jarðgöngum og úrbóta á Suðurfjarðavegi og Öxi, lýst er yfir áhyggjum af síhækkandi fargjöldum í innanlandsflugi og hafnað bílastæðagjaldi á Egilsstaðaflugvelli, auk þess sem þingið kallar eftir jöfnun raforkukostnaðar, að tekjur af fiskeldi og orkumannvirkjum renni beint til sveitarfélaganna og fleira.

Smári Geirsson var heiðursgestur að þessu sinni. Smári er fæddur í Neskaupstað og hefur lagt Austurlandi starfskrafta sína alla tíð, bæði sem kennari og skólastjóri í nær fjóra áratugi og sem áhrifamikill sveitarstjórnarmaður í nær þrjátíu ár, þar sem hann leiddi m.a. Austfirðinga í baráttunni fyrir uppbyggingu álvers í Reyðarfirði. Hann hefur einnig unnið ómetanlegt starf sem sagnfræðingur og rithöfundur og hlaut riddarakross hinnar íslensku fálkaorðu árið 2014 fyrir framlag sitt. Smári hefur markað djúp spor í samfélag, sögu og menningu landshlutans og er vel að þessum heiðri kominn.