Í bókuninni tekur stjórn SSA undir sameiginlega bókun bæjarráðs Fjarðabyggðar og sveitarstjórnar Múlaþings og krefst þess að tillaga að samgönguáætlun verði tekin til heildstæðrar endurskoðunar og að Austurlandi verði tryggð réttmæt og sanngjörn hlutdeild í framkvæmdum á fyrsta tímabili hennar.

Bókun stjórnar SSA er þessi í heild sinni:

„Stjórn Sambands sveitarfélaga á Austurlandi tekur undir sameiginlega bókun bæjarráðs Fjarðabyggðar og sveitarstjórnar Múlaþings þar sem þau lýsa yfir gríðarlegum vonbrigðum með samgönguáætlun ríkisstjórnarinnar og þá köldu kveðju sem hún felur í sér fyrir fjórðunginn. Ljóst er að Austurland er sett í frost.

Breytingar á samgönguáætlun verða að byggja á faglegum forsendum og vönduðum rökum. Hún er lykiltæki til að tryggja gagnsæi og fyrirsjáanleika í innviðauppbyggingu. Framþróun sveitarfélaga má ekki ráðast af mismunandi pólitískum áherslum ráðherra hverju sinni. Trúverðug forgangsröðun er forsenda þess að sveitarfélög og atvinnulíf geti skipulagt uppbyggingu til lengri tíma.

Að engar stórar framkvæmdir skuli vera á fyrsta tímabili fyrir Austurland er óásættanlegt. Slík niðurstaða gengur þvert á gefin fyrirheit um að hækkun veiðigjalda myndi skila sér aftur til samfélaganna og skapa fjárhagslegt svigrúm til innviðafjárfestinga. Austurland er næst í röð jarðgangaverkefna og ólíðandi er að horfa fram hjá þeirri staðreynd.

Bæjarráð Fjarðabyggðar, sveitarstjórn Múlaþings og stjórn SSA krefjast þess að Alþingi taki tillögu að samgönguáætlun til heildstæðrar endurskoðunar og tryggi Austurlandi réttmæta og sanngjarna hlutdeild í framkvæmdum á fyrsta tímabili hennar.“