Austurland hefur tvívegis fengið Landstólpann, fyrst árið 2018 þegar Sköpunarmiðstöðin á Stöðvarfirði hlaut viðurkenninguna og síðan árið 2021, þegar Hákon Hansson dýralæknir á Breiðdalsvík var heiðraður fyrir framlag sitt til samfélagsins. Landstólpinn er því mikilvægur vettvangur til að varpa ljósi á þá sem leggja sitt af mörkum til uppbyggingar og jákvæðrar þróunar í nærumhverfi sínu.

Við val á handhafa Landstólpans er horft til þess hvort viðkomandi hafi:

• Styrkt ímynd viðkomandi svæðis
• Vakið athygli á byggðamálum og aukið umræðu um þau
• Stutt við eflingu samfélags og lífsgæða íbúa
• Aftur leitt til aukinnar samstöðu og jákvæðni íbúa
• Aukið aðdráttarafl svæðisins með verkefnum eða umfjöllun

Viðurkenningunni fylgir listmunur hannaður af íslenskum listamanni auk verðlaunafjár að upphæð 1.000.000 króna.

Að tilnefna einstakling, fyrirtæki eða verkefni til Landstólpans er einstakt tækifæri til að lyfta fram því sem vel er gert og sýna virðingu fyrir þeim sem stuðla að betra samfélagi. Við hvetjum íbúa Austurlands til að senda inn tilnefningar og taka þátt í því að varpa ljósi á það góða starf sem á sér stað í landshlutanum.

Frestur til að skila inn tilnefningum rennur út föstudaginn 28. febrúar 2025, og ber að senda þær á netfangið [email protected].