Í hjarta Hallormsstaðaskógar stendur Hallormsstaðaskóli í tignarlegu húsi í burstabæjarstíl. Skólinn á sér langa sögu en upphaf hans má rekja til ársins 1930. Á síðustu árum hefur námskrá og stefna hans tekið miklum breytingum og er það mat skólameistarans Bryndísar Fionu Ford að svona skóli verði ávallt að þróast með samfélaginu og taka mið af þörfum þess. Skólinn hefur fengið styrki frá Uppbyggingarsjóði Austurlands tvö síðustu ár m.a. til að ráðast í metnaðarfull þróunar- og nýsköpunarverkefni.
Styrkir frá Uppbyggingarsjóðnum hafa m.a. verið nýttir til að þróa svonefnt „Tilraunaeldhús“, verkefni sem snýst um að nýta betur vottað eldhús skólans fyrir almenning. Tilraunaeldhúsið býður upp á aðstöðu, tæki og tól sem oft er mikill kostnaður við að koma sér upp. Í því geta frumkvöðlar á Austurlandi unnið að nýsköpun í matvælaframleiðslu og annarri vöruframleiðslu og þar hafa nú þegar verið haldin vel heppnuð námskeið fyrir almenning þar sem sjálfbærni og sköpun, lykilgildi skólans, eru höfð að leiðarljósi.
Þótt Hallormsstaðaskóli sé rótgróin telur Bryndís Fiona Ford, skólameistari, að hann verði að þróast í takti við nýja tíma. „Næstu ár munu reynast mörgum stofnunum og fyrirtækjum erfið,“ segir hún. „Í dag eru gerðar alls konar kröfur sem ekki voru gerðar áður, samanber græn skref í rekstri fyrirtækja, og viðskiptavinir kalla á grænar áherslur. Við teljum okkur vera að svara þessu ákalli,“ segir hún og bætir við: „Ekki skiptir máli hvort stofnunin eða fyrirtækið er nýtt eða gamalt, stöðnun er það versta sem hent getur gott fyrirtæki. Við getum ekki leyft okkur að festast í viðjum vanans og kenna sama efnið ár eftir ár. Við verðum að vera opin fyrir nýjungum, fylgjast með því sem er að gerast í heiminum og nýta ný og áður óséð sóknarfæri.“
Hún segir að Uppbyggingarsjóður Austurlands þjóni mikilvægu hlutverki í þessu tilliti. „Sú stefna hefur verið mörkuð hjá sjóðnum að styrkja færri verkefni um hærri fjárhæðir,“ segir hún. „Það tel ég mikið heillaskref því veglegur styrkur eykur svigrúmið til að framkvæma nýjungar og aðlaga sig að breyttu umhverfi. Veglegur styrkur veitir byr undir báða vængi og líkurnar á að verkefni komist á flug aukast þannig til muna. “
Bryndís segir mjög lærdómsríkt að ganga í gegnum umsóknarferlið. „Þú kynnist styrkjaumhverfinu, og ferð að sjá tækifærin í því. Styrkur úr Uppbyggingarsjóðnum getur hæglega aukið líkurnar á að þú fáir aðra og jafnvel mun stærri styrki úr öðrum sjóðum. Og þá á ég ekki eingöngu við sjóði hérlendis heldur erlendis líka. Ef þú hefur góða hugmynd og trú á henni skaltu hiklaust sækja um í Uppbyggingarsjóð Austurlands. Það á eftir að borga sig.“
Hún hefur nýtt sér þjónustu Austurbrúar þegar kemur að styrkumsóknum. „Austurbrú býður t.d. upp á vinnustofur sem nýtast umsækjendum sem e.t.v. hafa ekki mikla reynslu. Nýtið ykkur þá aðstoð sem býðst þar sem góð hugmynd er ekki ávísun á góða og vandaða umsókn.“ Hún mælir með hlaðvarpsþætti á Austurland hlaðvarp þar sem Tinna Halldórsdóttir og Signý Ormarsdóttir, verkefnastjórar sjóðsins, segja frá því hvað einkenni góða umsókn. „Þá mæli ég jafnframt með því að þú skoðir alla samstarfsfleti,“ segir hún. „Samstarf getur styrkt verkefnið og ekki síður umsóknina sjálfa. Og sameinuð stöndum við sterkari í uppbyggingu á atvinnutækifærum og ábyrgri nýsköpun á Austurlandi,“ sagði Bryndís að lokum.
Umsóknir og vinnustofurFrá stofnun hefur Austurbrú unnið að fjölmörgum verkefnum á sviði menningar, markaðssetningar, atvinnuþróunar og fræðslu. Kynntu þér nýjustu tíðindin!
Skoða fréttasafn