Gögn sem nýtast – fyrir stefnumótun framtíðar
Sjálfbærniverkefnið er einstakt að því leyti að það byggir á reglubundnum mælingum yfir tveggja áratuga tímabil. Slík samfella gagna gefur traustan grunn fyrir sveitarfélög, stofnanir og samfélagið allt til að taka upplýstar ákvarðanir um þróun og þjónustu næstu ára.
20 ára vöktun samfélags, umhverfis og efnahags á Austurlandi
Árið 2025 fer fram uppgjör á einu lengsta og umfangsmesta þróunarverkefni sinnar tegundar á Íslandi – sjálfbærniverkefni Alcoa Fjarðaáls og Landsvirkjunar. Verkefnið, sem hófst árið 2004 í tengslum við Kárahnjúkavirkjun og álverið í Reyðarfirði, miðar að því að fylgjast með áhrifum framkvæmda á samfélag, umhverfi og efnahag Austurlands – með sjálfbæra þróun að leiðarljósi.
Niðurstöðurnar eru settar fram í þremur meginflokkum:
• Samfélagsvísar, sem mæla þróun mannfjölda, jafnréttismál, heilsu og menntun.
• Umhverfisvísar, sem fylgjast með gæðum náttúrunnar.
• Efnahagsvísar, sem skoða atvinnulíf, þjónustu og fjárhagsstöðu sveitarfélaga.
Austurland í stöðugri þróun
Fyrsta greining uppgjörsins beinist að íbúaþróun síðustu 20 ára og niðurstöðurnar eru áhugaverðar: Austfirðingum hefur fjölgað um 17,3% síðan 2004 – mest í tengslum við framkvæmdir fyrstu árin. Mest hefur fjölgunin verið á miðsvæði Austurlands, sérstaklega á Egilsstöðum og Reyðarfirði. Á sama tíma hefur fækkað í mörgum minni byggðakjörnum.
Aldurssamsetningin hefur einnig breyst: Fleira ungt fólk er nú á svæðinu en börnum hefur fækkað og fjölgun í hópi eldra fólks er veruleg. Þessar breytingar kalla á endurskoðun á þjónustu og stefnumótun – og sjálfbærniverkefnið veitir mikilvægar upplýsingar til þess.
Nýlegar fréttir – hver er staðan núna?
Á vef sjálfbærniverkefnisins hafa nýverið verið birtar þrjár áhugaverðar fréttir sem kafa dýpra í niðurstöður greiningarinnar:
• Íbúum fjölgar á Austurlandi – fjölgun á Austurlandi er raunveruleg, en hlutfall svæðisins af heildarmannfjölda landsins minnkar.
• Íbúaþróun og byggðirnar – vöxtur á miðsvæði en áskoranir á jaðarsvæðum kalla á nýja nálgun.
• Breytt aldurssamsetning kallar á viðbrögð – eldra fólk fjölgar, börnum fækkar. Hvað þýðir það fyrir þjónustu og skipulag framtíðar?
Kíktu inn á vefinn – og fylgstu með!
Allar nánari upplýsingar um verkefnið og niðurstöður má finna á www.sjalfbaerni.is. Þar er einnig að finna sögu verkefnisins, mælikvarða og fleiri greiningar sem munu birtast á árinu.
Austurbrú hvetur jafnframt alla sem hafa áhuga á framtíð Austurlands til að fylgja Facebook-síðu verkefnisins „Sjálfbærniverkefni á Austurlandi“ þar sem tilkynningar, greiningar og gögn verða kynnt eftir því sem þau berast.
Nánari upplýsingar
Lilja Sif Magnúsdóttir
Tinna Kristbjörg Halldórsdóttir
Fleiri fréttir
Frá stofnun hefur Austurbrú unnið að fjölmörgum verkefnum á sviði menningar, markaðssetningar, atvinnuþróunar og fræðslu. Kynntu þér nýjustu tíðindin!
Skoða fréttasafn
