Formaður SSA, Berglind Harpa Svavarsdóttir, flutti skýrslu stjórnar og fór þar yfir helstu verkefni sambandsins á liðnu starfsári. Hún greindi meðal annars frá áherslum á samgöngumál, raforkuöryggi, efnahagslegt réttlæti og uppbyggingu geðheilbrigðisþjónustu. Þá lagði hún áherslu á að vinna áfram gegn aðgerðum ríkisvaldsins sem sambandið hefur kallað „landsbyggðarskatt“, meðal annars í tengslum við gjaldtöku á Egilsstaðaflugvelli.

Í skýrslunni kom einnig fram að Sóknaráætlun Austurlands fyrir árin 2025–2029 hafi verið unnin með víðtæku samráði og sérstök áhersla lögð á að ná til ungs fólks og íbúa af erlendum uppruna. Þá vakti formaðurinn athygli á skýrslu sem SSA lét gera á stöðu fjarskiptamála á Austurlandi sem sýni að veikleikar í farneta- og neyðarkerfum geti haft áhrif á öryggi, þjónustu og lífsgæði íbúa á svæðinu.

Á fundinum var ársreikningur SSA fyrir árið 2024 kynntur og samþykktur samhljóða. Einnig voru endurskoðuð fjárhagsáætlun fyrir 2025, áætlun fyrir árið 2026 og tillögur að árgjöldum samþykktar án athugasemda.

Breytingar á samþykktum SSA voru til umræðu á fundinum og lagðar fram tvær tillögur. Einnig kom fram tillaga um áframhaldandi vinnu við að móta tillögur um stjórnarskipulag SSA til afgreiðslu á haustþingi 2026.