Verkefnið Áfangastaðurinn Austurland snýr að verkefnum sem ætlað er að efla Austurland sem áfangastað ferðamanna. Tilgangurinn er að markaðssetja svæðið sem áhugaverðan kost til að heimsækja en einnig til búsetu og starfa. Verkefnin byggja á samningum við Ferðamálastofu, Íslandsstofu og sveitarfélögin á svæðinu. Verkefnið felur í sér þátttöku í ferðasýningum, móttöku blaðamanna, áhrifavalda og ferðaskrifstofa, rekstur ferðavefjar og samfélagsmiðla fyrir Austurland. Þá er unnið að eflingu Egilsstaðaflugvallar með það að markmiði að koma á beinu millilandaflugi um Egilstaðaflugvöll og þannig styrkja og efla áfangastaðinn Austurland árið um kring.

Austurland er dreifbyggt og stendur frammi fyrir ýmsum áskorunum vegna smæðar, erfiðra samgangna og einhæfs atvinnulífs. Byggðaþróunarverkefni Austurbrúar eru studd af Byggðastofnun. Markmið þeirra eru annars vegar að styðja við atvinnu- og samfélagsþróun í einstökum þéttbýliskjörnum (t.d. Brothættar byggðir) og hins vegar sértækari verkefni sem byggja á svipaðri hugmyndafræði og hafa sama tilgang þ.e. að styðja við og efla austfirsk samfélög.

Þannig hefur Austurbrú unnið að verkefnum undir merkjum byggðaþróunarverkefnisins Brothættra byggða á Breiðdalsvík, Borgarfirði eystri og í Fljótsdal og núna á Stöðvarfirði. Unnið er að verkefnum sem styðja við nýsköpun og eflingu búsetugæða í sveitum t.a.m. byggðaþróunarverkefnin Vatnaskil og Sjávarföll, stuðningur við nýtingareldhús á Vopnafirði, atvinnuuppbygging á Seyðisfirði, svæðisáætlun um úrgangsmál, miðlun upplýsinga um húsnæði fyrir staðsetningarlaus störf og skipulagning umhverfisþings.

Öll verkefnin sem hér hafa verið nefnd eru tímabundin en frá stofnun hefur Austurbrú unnið að samskonar verkefnum, með ólíkum áherslum en sama tilgang: Að efla byggð í landshlutanum, auka lífsgæði heimamanna og auka aðdráttarafl fyrir gesti og nýja íbúa.