Húsnæði fyrir óstaðbundin störf
Á vefnum „Óstaðbundin störf á Austurlandi“ er að finna gagnagrunn með upplýsingum um húsnæði sem hentar þeim sem vilja starfa án staðsetningar.
Vinnumenning hefur breyst á síðustu árum og sífellt fleiri starfa með þessum hætti. Austurland býður upp á góðar aðstæður fyrir slíka starfsemi, með sterka innviði, fjölbreytt húsnæði og aðlaðandi umhverfi.
Nánar
Samvinnurými í þróun
Samband sveitarfélaga á Austurlandi (SSA) vinnur markvisst að því að efla innviði sem styðja við óstaðbundin störf með uppbyggingu samvinnurýma víða um landshlutann. Verkefnin eru meðal annars fjármögnuð í gegnum byggðaáætlun stjórnvalda, þar sem lögð er áhersla á atvinnuþróun, nýsköpun og eflingu byggða.
Dæmi um þetta er uppbygging samvinnurýmis á Stöðvarfirði sem hefur hlotið styrk úr sértækum verkefnum sóknaráætlunarsvæða. Sambærileg uppbygging hefur einnig verið studd á Vopnafirði, þar sem unnið er að því að styrkja atvinnuumhverfi og skapa aukin tækifæri til fjarvinnu.
Markmiðið er að bæta aðgengi að vinnuaðstöðu, styðja við frumkvöðlastarf og fjarnám og þannig styrkja búsetuskilyrði og fjölbreytni atvinnulífs á svæðinu.
Með þessum verkefnum er unnið að markvissri uppbyggingu innviða sem mæta breyttri vinnumenningu og auka aðdráttarafl Austurlands sem staðar til búsetu og starfa.
Staða samvinnurýma á Austurlandi
Austurbrú lét nýverið vinna stöðugreiningu á samvinnurýmum á Austurlandi þar sem farið er yfir stöðu þeirra, þróunarmöguleika og hlutverk í atvinnu- og byggðaþróun á svæðinu.
Greiningin undirstrikar mikilvægi samvinnurýma sem lykilinnviða fyrir sveigjanlegt atvinnulíf og aukin tækifæri til starfa óháð staðsetningu.
Nánar
