Matvælaframleiðsla af ýmsu tagi er samofin sögu Austurlands og íbúar landshlutans hafa alla tíð verið duglegir að nýta gæðin í umhverfinu. Hjá Austurbrú er unnið að því að kortleggja hver þessi gæði eru og hvernig þau eru nýtt í dag. Tilgangurinn er að sjá hvernig hægt sé að stuðla að þekkingaruppbyggingu, nýsköpun og þróun í matvælaframleiðslu sem byggir á auðlindum svæðisins.
Sumarið 2023 fékk Austurbrú styrk frá umhverfis-, orku- og loftslagsráðuneyti til að vinna að verkefni sem hlaut nafnið „Landsins gæði – matur í náttúru Austurlands.“ Markmiðið er að ná betri yfirsýn yfir nýtingu íbúa á þessum gæðum landshlutans, hver þau eru í dag og hvaða möguleikar felast í aukinni þekkingu og vitund um þessi mál með áherslu á sjálfbæra nýtingu.
Framkvæmd verkefnisins er skipt í þrjá hluta og er fyrsta hluta lokið. Hann fólst í skipulagningu svonefnds Matarmóts á Egilsstöðum sl. haust þar sem austfirskir matvælaframleiðendur kynntu vörur sínar, haldnar voru fjölbreyttar málstofur og þá fór fram aðalfundur Austfirskra krása (klasasamstarf matvælaframleiðenda og veitingahúsa á Austurlandi).
Annar hluti verkefnisins felst í rannsókn sem nú stendur yfir. Í henni er reynt að ná utan um hver þessi gæði eru í landshlutanum og hvort, og þá hvernig, íbúarnir nýta þau. Tengil á könnunina má finna hér að neðan. Við hvetjum alla íbúa Austurlands til að taka þátt í rannsókninni en jafnframt verða myndaðir rýnihópar með veiðimönnum (skot- og stangveiðimenn) á svæðinu og óskum við hér með eftir sjálfboðaliðum í slíka hópavinnu. Gert er ráð fyrir að fundað verði með rýnihópunum í lok apríl og í byrjun maí. Þau sem hafa áhuga á því að deila reynslu sinni eru vinsamlegast beðin um að hafa samband við Halldóru hjá Austurbrú (sjá netfang og símanúmer hennar neðst í fréttinni).
Tengill á könnunÞriðji og lokahluti verkefnisins er fólgin í skipulagningu vinnustofu og málþings þar sem niðurstöður rannsóknarinnar verða kynntar. Rýnt verður í þær með aðstoð sérfræðinga og metið með hvaða hætti hægt sé að auka nýsköpun og þróun í framtíðinni sem byggir á nýtingu gæða og auðlinda Austurlands.
Verkefnið er unnið á grunni heimsmarkmiða Sameinuðu þjóðanna og þeirra áherslna sem lagðar eru til grundvallar í Svæðisskipulagi Austurlands og í sóknar- og áfangastaðaáætlun landshlutans. Þá er það aukinheldur í samræmi við ýmsar opinberar áætlanir s.s. matvælastefnu og stefnu um heilsueflandi samfélag svo dæmi séu nefnd.
Við framkvæmd verkefnisins leggjum við áherslu á góða samvinnu með ýmsum stofnunum, fyrirtækjum og frumkvöðlum á Austurlandi en umsjón og verkefnastýring verður þó alfarið í höndum Austurbrúar.
Frá stofnun hefur Austurbrú unnið að fjölmörgum verkefnum á sviði menningar, markaðssetningar, atvinnuþróunar og fræðslu. Kynntu þér nýjustu tíðindin!
Skoða fréttasafn