Námskeið á ýmsum þrepum
Austurbrú hefur um árabil sinnt kennslu fyrir útlendinga í landshlutanum og hafa fleiri hundruð manns farið í gegnum tungumála- og samfélagsnám hjá okkur. Á hverju ári auglýsum við námskeið í íslensku á þrepi eitt til fjögur og höldum námskeið um allt Austurland.
Námsframboð
Áframhaldandi þróun
Talsverð þróunarvinna hefur farið fram á allra síðustu misserum til að bæta aðgengi að náminu. Heimsfaraldurinn á árunum 2020 – 2021 sýndi að huga þurfti að nýjum lausnum svo að nemendur og kennarar gætu nýtt upplýsingatæknina betur í náminu.
Betra aðgengi að námi
Raunar hafði markviss þróunarvinna kennslunnar hafist fyrir faraldurinn en árið 2019 var farið af stað með hugmyndavinnu um hvernig hægt væri að halda úti námskeiðum í fámennari byggðarlögum með fjarkennslu. Ráðinn var starfsmaður til Austurbrúar sem vinnur að verkefninu og standa vonir til þess að hægt verði að hefja fjarnám haustið 2021. Sérstaklega er horft til námskeiða þrjú og fjögur en þar eru oft færri þátttakendur en í byrjendanámskeiðunum og því erfitt að ná í hópa í fámennari byggðarlögum.
Gagnvirkt kennsluefni í þróun
Til að íslenskunámið nýtist sem flestum innflytjendum um allt Austurland hefur verið ýtt úr vör verkefni sem snýst um að þróa gagnvirkt efni (tölvuleik) sem auðvelt er að uppfæra og aðlaga að mismunandi þörfum nemenda, fyrirtækja og stofnana sem vilja auka færni erlendra starfsmanna. Auk þess er hann hugsaður sem nokkurs konar undirnámskrá eða viðmiðunarrammi fyrir kennara. Unnið hefur verið að verkefninu á árinu 2021.
Verkefnisstjórn
Arnar Úlfarsson
