Austurbrú býður íbúum af erlendum uppruna á Austurlandi upp á aðstoð og leiðsögn við gerð skattframtals í byrjun mars. Markmiðið er að auðvelda fólki að rata um kerfið, skilja réttindi sín og draga úr þeirri óvissu sem getur fylgt skattaskilum.

Á staðnum verður sérfræðingur í skattamálum sem veitir leiðbeiningar og svarar spurningum. Um er að ræða stuðning við ferlið sjálft ekki fulla útfyllingu framtals og lögð verður áhersla á að skapa öruggt rými fyrir spurningar og samtal.

Viðburðirnir eru hluti af verkefninu „Þetta er samfélagið okkar“, sem miðar að því að efla samfélagsþátttöku og inngildingu íbúa af erlendum uppruna á Austurlandi. Verkefnið byggir á niðurstöðum rýnihópa þar sem kom skýrt fram að aðgengi að upplýsingum og skilningur á réttindum eru lykilforsendur þess að fólk upplifi sig sem fullgildan þátttakanda í samfélaginu.

Aðgerðir af þessu tagi falla vel að áherslum Sóknaráætlunar Austurlands, þar sem lögð er áhersla á samfélag fyrir alla, öfluga mannauðsuppbyggingu og aukna þátttöku íbúa. Jafnframt styðja þær við markmið Svæðisskipulags Austurlands, sem leggur áherslu á sjálfbær og inngildandi samfélög þar sem allir íbúar hafa raunverulegt aðgengi að upplýsingum, réttindum og tækifærum.

Egilsstaðir – Vonarland, þriðjudaginn 3. mars kl. 16:00–18:00
Reyðarfjörður – Fróðleiksmolinn, fimmtudaginn 5. mars kl. 16:00–18:00

Aðgangur er ókeypis en skráning er nauðsynleg. Skráning fer fram með tölvupósti á [email protected].

Mælt er með að þátttakendur taki með sér fartölvu ef kostur er. Rafrænt skilríki í síma nægir.

• Þekkir þú einhvern sem gæti haft gagn af þessari aðstoð? Við hvetjum heimamenn til að deila upplýsingunum áfram og benda vinum, samstarfsfólki og nágrönnum á tækifærið. Með því styrkjum við samfélagið okkar í heild.